राष्ट्रिय सभागृहको सभाकक्षमा प्रधानमन्त्री केपी शर्मा ओलीले तीनवटा अभूतपूर्व काम गर्नुभयो । पहिलो तत्कालीन माओवादी केन्द्रसंग एकता, पृथकतावादी आन्दोलन गरिरहेको सिके राउत र सरकारसंग सम्झौता अनि आज (फागुन २१ गते) हिंसात्मक गतिविधि गरिरहेको प्रतिबन्धित नेकपा (नेत्रविक्रमम चन्द नेतृत्व)संग ३ बुँदे सहमति ।
बुधबार र बिहिबार भएको औपचारिक वार्तापछि भएको ३ बुँदे सहमतिपत्रमा हस्ताक्षर कार्यक्रममा प्रधानमन्त्री तथा नेपाल कम्युनिष्ट पार्टी (नेकपा)का अध्यक्ष केपी शर्मा ओलीले शुक्रबार मात्रै रिहा भएका नेकपा नेता धर्मेन्द्र वास्तोला चाँडै जेलबाट छुटेको र यति चाँडै छुट्न पाएको भए, आफू त १४ वर्ष जेल बस्नुपर्यो भन्दै भाषण सुरु गर्नुभयो ।
सम्बोधनका क्रममा उहाँले हिंसात्मक द्वन्द्वमा रहेको विप्लब समूहसँग तीनबुँदे सहमति भएपछि मुलुकमा अब द्वन्द्वात्मक हिंसाको अन्त्य भएको प्रष्ट पार्नुभयो । उहाँले नेपाल र नेपाली जनताले शान्ति खोजेको चर्चा गर्नुहुँदै राष्ट्रियता, राष्ट्रिय अखण्डता, सामाजिक न्याय र समानता, अधिकारसम्म पुग्ने अवसरको प्राप्ती, लोकतन्त्रको रक्षा र शान्ति चाहेको उहाँले चर्चा गर्नुभयो ।
‘समृद्ध नेपाल सुखी नेपाली’ स्थापित गर्न शान्तिपूर्ण वातावरणको आवश्यकता पर्ने भन्नुहुँदै प्रधानमन्त्री ओलीले महासचिव चन्दले ऐतिहासिक जिम्मेवारी वहन गर्नुभएको भन्दै सरकार र पार्टीको तर्फबाट धन्यवाद व्यक्त गर्नुभयो । “यो क्र्यास ल्याण्डिङ होइन, सफ ल्याण्डिङ हो” प्रधानमन्त्री अोलीले भन्नुभयो, “यो रातारात गरेको सहमति होइन, लामो समयपछिको उपलब्धीको परिणाम हो ।” विप्लब पक्षसँग छलफल र वार्ता गरेको दशौं वर्ष पुगेको उहाँले स्मरण गर्नुभयो ।
सहमति कार्यान्वयनको चरणमा कुनै समस्या आए वार्ताद्वारा सहमति खोजिने प्रष्ट पार्नुहुँदै प्रधानमन्त्री ओलीले थप्नुभयो, “यो सहमतिले नेपाललाई नयाँ युगमा प्रवेश गराएको छ ।” यसअघि सिके राउतसँग पनि यसैगरी वार्ताबाट सहमति गरी शान्तिको मूलधारमा ल्याएको प्रधानमन्त्री ओलीले स्मरण गर्नुभयो । शान्तिको नयाँ युगमा नेपाल प्रवेश गरेपछि नेपालको समृद्धि अब असम्भव नहुने बताउनुभयो ।
“आजको उपलब्धीले विश्वकै कम्युनिष्ट आन्दोलनलाई नयाँ सन्देश दिएको छ” चर्चा गर्नुहुँदै प्रधानमन्त्री ओलीले थप्नुभयो, “असल मनसायका साथ अगाडि बढ्दा सफलता प्राप्त हुन्छ भन्ने हामी दृष्टान्त बन्न सफल भएका छौं ।” कोही मान्छेहरु देशलाई बर्बाद गर्न खोजेको उहाँले टिप्पणी गर्नुभयो । उहाँहरुको माक्र्सवाद के हो म बुझ्दिनँ उहाँले भन्नुभयो ।
कार्यक्रममा प्रधानमन्त्री ओलीले प्रचण्डनेपाल समूहको संसदीय दलको बैठक चलिरहेकोमा व्यंग्य गर्द संसदीय दलको नेता यहाँ छ, खैँ कता हो बैठक भैरहेको छ रे भन्दै भन्नुभयो “हामी प्रधानमन्त्रीको प्रस्ताव कसैलाई राखेका छैनौं र राख्न पनि राख्दैनौं” भन्दै प्रधानमन्त्री ओलीले आफूले लोकतन्त्रको सही अभ्यासका लागि प्रतिनिधिसभा विघटन गरेको भए पनि सर्वोच्चले पुनस्र्थापना गर्दा नयाँ तमासा शुरु भएको बताउनुभयो ।
प्रचण्ड–माधव पक्षप्रति टिप्पणी गर्नुहुँदै उहाँले थप्नुभयो, “उहाँहरुको कार्यशैली देखेर अचम्म लाग्छ, आफ्नो दलको प्रधानमन्त्रीलाई किस्तीमा राखेर अरु दललाई दिन हिँड्नुभएको छ ।” केही मानिसले कम्युनिष्ट आन्दोलन बदनाम गर्न खोजे पनि आफूहरुले त्यसो हुन नदिने बताउनुभयो । आफू नेतृत्वको वर्तमान सरकार सफल सरकार भएको पनि उहाँले दावी गर्नुभयो । सन् २०३० भित्र दिगो विकास लक्ष्य प्राप्त गर्न सफल हुने पनि उहाँले विश्वास व्यक्त गर्नुभयो ।
साहसिक कामको शुरुवातमा सहभागी हुनुभएकोभन्दै महासचिव चन्दलाई प्रधानमन्त्री ओलीले धन्यवाद व्यक्त गर्नुहुँदै मुलधार राजनीतिका लागि शुभकामना व्यक्त गर्नुभयो । वार्ता टोलीमा रहेर महत्वपूर्ण भूमिका निर्वाह गर्नुहुने सबै नेतालाई प्रधानमन्त्री ओलीले धन्यवाद व्यक्त गर्नुभयो । प्रत्यक्ष, परोक्ष, प्रकट अप्रकट ढङ्गले योगदान दिने सबैलाई उहाँले धन्यवाद व्यक्त गर्नुभयो । यस खुशीको दिन, सफलताको दिन, देशले जितेको दिनलाई सार्थक बनाउने सबै पक्षलाई धन्यवाद व्यक्त गर्नुभयो ।
प्रधानमन्त्री ओली र नेकपा ९विप्लब समूह० का महासचिव नेत्रविक्रम चन्द २ बजेर ४८ मिनेटमा राष्ट्रिय सभा गृहमा प्रवेश गर्नुभएको थियो । कार्यक्रममा दुवै पक्षका चार–चार जना नेताहरु मञ्चमा आसीन रहनुभयो । प्रधानमन्त्रीको दायाँ भागमा उपप्रधानमन्त्री ईश्वर पोखरेल, गृहमन्त्री रामबहादुर थापा ‘बादल’ र संसदीय दलका उपनेता सुवासचन्द्र नेम्वाङ आसीन रहनुभएको थियो ।
त्यसैगरी महासचिव चन्दको बायाँ भागमा खडगबहादुर विश्वकर्मा, उदयबहादुर चलाउने ‘दीपक’ र अन्य नेताहरु बस्नुभएको थियो । फागुन १८ गते मंगलबार सरकारको तर्फबाट र नेकपा (विप्लब समूह) ले अलग अलग वार्ता टोली गठन गर्नुभएको थियो । दुवै समूहबीचको वार्तापछि २० गते बिहीबार तीनबुँदे सहमति भएको थियो । कार्यक्रमको सञ्चालन डा। राजन भट्टराईले गर्नुभएको थियो ।
प्रतिक्रिया राख्नुहोस्