केपी शर्मा ओली नेतृत्वको सरकार ढालेर गठबन्धन सरकार बनेको सात महिना पूरा भैसकेपछि पूर्व सरकारका पालामा नियुक्त भएका संवैधानिक निकायका पदाधिकारीको नियुक्ति विरुद्ध परेका रिटबिरुद्धको सुनुवाई बल्ल थालिएको छ ।
शुक्रबार रिटमाथि बहस गर्दै अधिवक्ता ओमप्रकाश अर्यालले रिटमाथिको सुनुवाइ अघि बढाउन माग गर्नुभएको थियो । सो रिटलाई आज शुक्रबार हेर्दा हेर्दैमा राखिएको छ भने आगामी बुधबार संवैधानिक इजलासमा सुनुवाइ हुनेछ ।
संवैधानिक इजलासमा कायममुकायम प्रधानन्यायाधीश दीपककुमार कार्की, न्यायाधीशहरू मिरा खड़का, हरिकृष्ण कार्की, विश्वम्भर श्रेष्ठ र ईश्वरप्रसाद खतिवडा रहनुभएको छ ।
१७ भदौ २०७८ मा न्यायाधीश हरि फुयाँलले जारी गरेको अन्तरिम आदेशका कारण संवैधानिक पदाधिकारीको नियुक्ति विरुद्धमा परेका मुद्दाको सुनुवाइमा अवरोध भएको भन्दै अर्यालले त्यो अवरोध खुलाउन माग गर्नुभएको थियो ।
न्यायाधीश हरि फुयाँलको एकल इजलासले १७ भदौ २०७८ मा रेग्मीको रिट निवेदनमाथि सुनुवाइ गर्दै संवैधानिक परिषदसम्बन्धी अध्यादेश र त्यसका आधारमा भएको नियुक्ति सम्बन्धी मुद्दाको सुनुवाइ स्थगित गर्न आदेश दिएको थियो ।
प्रतिक्रिया राख्नुहोस्