रुसी राष्ट्रपति भ्लादिमिर पुटिनले सोमबार चिनियाँ राष्ट्रपति सी चिनफिङलाई युक्रेन द्वन्द्वको समाधानका लागि चीनको प्रस्तावलाई सम्मानका साथ हेरेको बताउनु भएको छ ।
रुसको तीन दिने राजकीय भ्रमणका लागि मस्को पुग्नु भएका राष्ट्रपति सी चिनफिङलाई पुटिनले चीनको युक्रेन शान्ति योजनाबारे छलफल गर्ने बताउनु भएको छ ।
चीनका राष्ट्रपति सी रुसका राष्ट्रपति पुटिनसँग भेटघाट गर्न मस्को पुग्नुले दुई राष्ट्रबीचको घनिष्ठ सम्बन्धलाई उजागर गरेको र कीभ र यसका पश्चिमी सहयोगीहरूलाई यस बारे चनाखो रहने सङ्केत मिल्ने देखिएको छ ।
राष्ट्रपति सीले आफ्ना रुसी समकक्षी पुटिनलाई आगामी वर्ष हुने राष्ट्रपतीय निर्वाचनमा रुसी जनताको समर्थन प्राप्त हुनेमा आफू विश्वस्त रहेको समेत उल्लेख गर्नु भएको छ ।
मस्कोमा जारी भ्रमणको शुरुवातमा अनौपचारिक वार्तामा बोल्दै राष्ट्रपति पुटिनले हालैका दशकहरूमा चीनको द्रुत विकासबाट रुस “अलिकति ईर्ष्यालु” भएको पनि बताउनु भएको छ ।
यसैबीच युक्रेन र बेलाइतले चिनियाँ नेतालाई आफ्नो प्रभाव प्रयोग गर्न र मस्कोलाई युद्ध अन्त्य गर्न दबाब दिन आग्रह गरेका छन् । पछिल्लो समय बेलाइतले चीनले क्षेत्रीय अखण्डताको सम्मानका लागि आफ्नो समर्थनलाई समर्थन गर्न र रुसलाई युक्रेनमा युद्ध अन्त्य गर्न आग्रह गरेको छ।
“हामी आशा गर्दछौं कि राष्ट्रपति सीले यस अवसरमा राष्ट्रपति (भ्लादिमिर) पुटिनलाई युक्रेनी शहरहरू, अस्पतालहरू, विद्यालयहरूमा बमबारी रोक्न दबाब दिनुहुनेछ ।
हामीले दैनिक देखिरहेका यस्ता वीभत्स घटना रोक्नका निम्ति यो भ्रमण महत्त्वपूर्ण हुनेछ,” प्रधानमन्त्री ऋषि सुनकका प्रवक्ताले उल्लेख गर्नु भएको छ ।
साथै कीभले चीनले युक्रेनमा युद्ध अन्त्य गर्न रुसमाथि आफ्नो प्रभावको कूटनीति प्रयोग गर्ने अपेक्षा गरेको युक्रेनी विदेश मन्त्रालयका प्रवक्ता ओलेग निकोलेन्कोले बताउनु भएको छ ।
रुसको राजकीय भ्रमणको पहिलो दिन एक दोभाषे मार्फत बोल्दै राष्ट्रपति सीले पुटिनलाई धन्यवाद दिँदै बेइजिङले मस्कोसँग घनिष्ठ सम्बन्ध राख्नुपर्ने बताउनु भएको छ ।
रुस-युक्रेन युद्ध सन् २०२२ फेब्रुअरी २४ मा शुरु भएयता चीनका राष्ट्र प्रमुखबाट आफ्नो छिमेकी र नजिकको रणनीतिक साझेदार रहेको देश रुसको भ्रमण गरेको यो पहिलो पटक हो ।
चीनका राष्ट्रपति सीको रुस भ्रमण हेगको अन्तरराष्ट्रिय फौजदारी अदालतले पुटिनलाई युक्रेनमा युद्ध अपराध गरेको आरोप लगाएको केही दिनपछि आएको हो।
शुक्रबार सीको मस्को यात्राको घोषणापछि ह्वाइट हाउसले चीनबाट सम्भावित प्रस्तावहरूको बारेमा चिन्ता व्यक्त गरेको छ । राष्ट्रपति सीको यस भ्रमणबाट विश्व राजनीतिमा नयाँ तरङ्ग पैदा भएको छ ।
प्रतिक्रिया राख्नुहोस्