जेनजी आन्दोलनको जाँचबुझ आयोगको प्रतिवेदनले जेनजी आन्दोलनका क्रममा भ्रामक सूचना फैलाउनेमा पाँच जना सोसल मिडिया इन्फ्लुएन्सर संलग्न रहेको ठहर गरेको छ । प्रतिवेदनमा आन्दोलन भड्काउनुमा सोसल मिडिया इन्फ्लुएन्सरको भूमिकाका बारेमा पनि उल्लेख गरेको छ ।
भ्रामक सूचना फैलाउने काममा संलग्न रहेका पाँच जनामा मिडिया इन्फ्लुएन्सर टंक दाहाल, सुजन ढकाल, शिव परियार, हिमेश पन्त र भाग्य न्यौपाने रहेका छन् ।
“अन्य भ्रामक प्रचारहरू जस्तै; २३ भदौको घटनामा चुच्चेपाटीस्थित भाटभटेनीमा ३५ शवको कंकाल भेटिएको भनी प्रचार गरियो । त्यस्तै, ३२ जना हराइरहेका प्रदर्शनकारी बानेश्वर संसद भवनभित्र मृत अवस्थामा भेटिए भनी २४ भदौमा प्रचार गरियो । यस्तो प्रचार गर्नमा सोसल मिडिया इन्फ्लुएन्सर टंक ढकाल, सुजन ढकाल, शिव परियार, हिमेश पन्त र भाग्य न्यौपानेजस्ता व्यक्तिहरू संलग्न रहेको पाइन्छ । अर्को एक (विमान परिचारिका)ले हिमालयन एयरलाइन्सबाट प्रधानमन्त्री केपी ओली भागेर दुबई पुगेको र उनले आफैँले देखेको भ्रामक प्रचार गरिन् । हिमालय एयरलाइन्सले यसको खण्डन गरी प्रेस वक्तव्य नै जारी गर्नुपर्यो । त्यस्तै एउटा अर्को मिडियामा नेपाली कांग्रेसका महामन्त्री गगन थापालाई भीडले घिसारेर पिटिरहेको प्रचार गर्यो, त्यो गलत प्रचार थियो । उपप्रधानमन्त्री तथा अर्थमन्त्री विष्णुप्रसाद पौडेल भीडबाट बच्न नदीमा भागिरहेका र व्यक्तिहरुले उनलाई पिटिरहेको दृष्य भिडियोमा देखाइएको थियो” प्रतिवेदनमा उल्लेख छ।
प्रतिक्रिया राख्नुहोस्