राष्टिय स्वतन्त्र पार्टीका समानुपातिक सांसद डा. ढाकाकुमार श्रेष्ठले मेडिकल व्यवसायी दुर्गा प्रसाईसंग दुई करोड मागेको अडियो सार्वजनिक भएपछि सो पार्टीले उहाँलाई निलम्बन गरी २४ घण्टे स्पष्टिकरण सोधेको छ ।
आइतबार मात्र स्वास्थ्यमन्त्री हुन सभापति रवि लामिछानेको टिमले २ करोड रुपैयाँ माग गरेको भन्दै प्रसाईंसँग रकम माग गरेको टेलिफोन संवाद बाहिरिएपछि रास्वपाले साधारण सदस्य समेत नरहने गरी निलम्बिन गरी स्पष्टिकरण सोधेको हो ।
रास्वपाका महामन्त्री डा. मुकुल ढकालले डा. श्रेष्ठलाई पार्टीको अनुशासन तथा आचरण समितिमा २४ घण्टाभित्र स्पष्टीकरण बुझाउन र श्रेष्ठमाथि छानबिन गरी प्रतिवेदन पेश गर्न अनुशासन तथा आचरण समितिलाई निर्देशन दिएको पनि ढकालले बताउनुभयो ।
जारी विज्ञप्तिमा भनिएको छ, ‘डा. श्रेष्ठको स्वरमा स्वास्थ्यमन्त्री बन्न पैसा दिनुपर्छ भन्ने संवाद रहेको उक्त टेलिफोन वार्ताका सम्बन्धमा सत्यतथ्य छानबिन गरी ३ दिनभित्र केन्द्रीय समितिमा प्रतिवेदन पेश गर्न पार्टीको केन्द्रीय अनुशासन समितिलाई निर्देशन दिइएको छ ।’
आफ्नोा अडियो बाहिरिएपछि सांसद डा. श्रेष्ठले सो आवाज आफ्नो नभएको र आफूलाई पार्टीका कुनै पनि पदाधिकारीले चन्दा माग्न नभनेको स्पष्ट पार्नुभएको छ ।
प्रतिक्रिया राख्नुहोस्