अमेरिकाको न्यू मेक्सिकोमा वैज्ञानिकहरूले मरेका चराहरूलाई ड्रोनको रूपमा नयाँ जीवन दिइरहेका छन् । वैज्ञानिकहरूले वन्यजन्तुसँग सम्बन्धित अनुसन्धानको क्षेत्रमा अपरम्परागत प्रयोगहरू गरिरहेका छन् ।
मेक्सिकोका वैज्ञानिकहरूले मरेका चराहरूलाई नयाँ जीवन दिन अनौठो प्रयोग गरेका हुन् । उनीहरूले यी चराहरूलाई ड्रोनमा परिणत गरेका छन् । सोकोरोमा रहेको खनन तथा प्रविधि संस्थानले ट्याक्सीडर्मी प्रविधिबाट संरक्षित मरेका चराहरूलाई उनीहरूको उडान अध्ययन गर्न ड्रोनमा परिणत गरेको छ ।
आयोजनाको नेतृत्व मेकानिकल इन्जिनियर डा. मुस्तफा हसनालियनले गरेका छन् । आफ्नो अनुसन्धानको क्रममा, उनले फेला पारे कि मेकानिकल चराहरूले आफूले खोजेको परिणाम दिन सक्षम थिएनन् । त्यसपछि उनले नयाँ प्रयोग गर्ने सोच बनाए । उनी भन्छन्, “हामीले मरेका चराहरूलाई ड्रोन बनाएर प्रयोग गर्न सक्छौं भन्ने विचार पायौं। सबै तयार छ, हामीले गर्नुपर्ने भनेको रिभर्स इन्जिनियरिङ हो।”
परीक्षण सुरु
ट्याक्सीडर्मी ड्रोन बर्डहरू हाल विश्वविद्यालयको ठूलो घेरामा परीक्षण भइरहेको छ । वैज्ञानिकहरू उड्दा चराहरूको बगालको ढाँचा के हो भनेर बुझ्न खोजिरहेका छन् । यस प्रयोगबाट प्राप्त जानकारीलाई उड्डयन उद्योगमा प्रयोग गर्न सकिने डा हसनालियन बताउँछन् ।
“यदि हामीले यी चराहरूले एकअर्कासँग समूहमा ऊर्जा व्यवस्थापन गर्ने तरिका सिक्न सक्छौं भने, हामी भविष्यमा विमानहरूलाई अझ प्रभावकारी रूपमा उडान गर्न, ऊर्जा र इन्धनको बचत गर्न प्रयोग गर्न सक्षम हुनेछौं,” डा. हसनालियनले भने ।
रंगको प्रभाव
यस अनुसन्धानमा सहायकको रूपमा काम गरिरहेका पीएचडी विद्यार्थी ब्रेन्डन हर्केनहफले आफू चराहरूको क्षमता र रूप बुझ्न चाहेको बताए । उनी भन्छन् कि धेरै मानिसहरू चराहरूको रङ या त आफूलाई छद्म पार्न वा अन्य चराहरूलाई साथीको लागि आकर्षित गर्नका लागि हो भन्ने विश्वास गर्छन् । तर हर्केनहफ जान्न चाहन्छन् कि तिनीहरूको रंगले उडानमा कुनै प्रभाव पारेको छ कि छैन ।
उनी भन्छन्, “हामीले प्रयोग गर्यौं र पत्ता लगायौं कि हाम्रो स्थिर-पखेटा विमानमा विशेष रंगले उडान क्षमतामा परिवर्तन ल्यायो । हामी विश्वास गर्छौं कि चराहरूमा पनि त्यस्तै हुन्छ ।”
हाल, मरेका चराहरूबाट बनेको ड्रोन २० मिनेटसम्म उड्न सक्ने, डा. हसनालियन बताए । उनले यस समय अवधिलाई कसरी बढाउने र अर्को चरण यी उडानहरू कसरी लामो समयसम्म चलाउने भनेर पत्ता लगाउने प्रयास हुने जानकारी दिए । त्यसपछि वैज्ञानिकहरूले यी ड्रोन चराहरूलाई जंगलमा रहेका वास्तविक चराहरूको बीचमा लिएर त्यहाँ परीक्षण गर्नेछन् ।
प्रतिक्रिया राख्नुहोस्