डलरसंग नेपाली मुद्राको अवमूल्यन इतिहासमै उच्च
नेपाली मुद्राको अवमूल्यन इतिहासमै उच्च भएको छ । भारतीय मुद्रा कमजोर भएका कारण अमेरिकी डलरको तुलनामा नेपाली मुद्राको अवमूल्यन अहिलेसम्मकै उच्च अवस्थामा पुगेको हो
![dollars](https://www.nepaljapan.com/wp-content/uploads/2014/05/dollars.jpg)
नेपाल राष्ट्र बैङ्कले मङ्गलबारका लागि सार्वजनिक गरेको विदेशी विनिमय दरअनुसार एक अमेरिकी डलरको बिक्री दर १२४ रुपियाँ २५ पैसा पुगेको छ ।
भारतसँग स्थिर विनिमय दर भएका कारण भारतीय मुद्रा अवमूल्यन भएपछि नेपाली मुद्रा पनि स्वचालित रूपमा कमजोर बनेको हो । भारतीय रुपियाँ एक सयको नेपाली रुपियाँ १६० स्थिर विनिमय दर छ ।
अन्तर्राष्ट्रिय बजारमा डलरको माग उच्च हुदैँ गएकाले डलरको मूल्य बढेको र अन्य मुद्राको अवमूल्यन भएको हो । अन्तर्राष्ट्रिय परिस्थितिले गर्दा डलर अझै महँगिने आकलन अर्थशास्त्रीहरूको छ ।
डलर महँगो हुँदा रेमिट्यान्स भित्रिने क्रम बढ्छ भने पर्यटक आगमन बढ्न लागेकाले केही फाइदा अर्थतन्त्रलाई हुन सक्छ । तर समग्रता आयात उच्च भएकाले नकारात्मक प्रभाव नै बढी हने नेपाल राष्ट्र बैंकका पूर्व गभर्नर डा. चीरञ्जीवी नेपाल बताउनुहुन्छ ।
डलर महँगो हुँदा नेपाली अर्थतन्त्रलाई समग्रमा नोक्सानी नै हुने देखिएको छ । यसै त विदेशी मुद्रा सञ्चिति खस्केको छ, यही बेला डलर बलियो बन्दा खरिदमा अझै बढी खर्च गर्नुपर्ने भएको छ । यसबाट मूल्यवृद्धि दोहोरो अङ्कसम्म पुग्न सक्ने डा. नेपालको अनुमान ।
पछिल्लो समय रुस–युक्रेन युद्धका कारण पनि अन्तर्राष्ट्रिय लगानीकर्ताले डलर सञ्चतिलाई नै प्राथमिकतामा राखेकाले पनि डलर बलियो भएको र यो क्रम अझै बढ्ने बताइएको छ ।
प्रतिक्रिया राख्नुहोस्