राजनीति

प्रधानमन्त्री देउवालाई पहिलो विदेश भ्रमणको निम्तो बंगलादेशबाट

यसअघि नेपालमा नयाँ प्रधानमन्त्री नियुक्त हुँदा सबभन्दा पहिले भारतबाट बधाई तथा शुभकामनासहित भारत भ्रमणको निम्तो आउने गर्दथ्यो र नेपालका प्रधानमन्त्रीबाट पनि पहिलो औपचारिक विदेश भ्रमण भारतबाटै हुन्थ्यो । यसपटक प्रधानमन्त्रीलाई पहिलो विदेश भ्रमणको निम्ता भने बंगलादेशबाट प्राप्त भएको छ ।

शुक्रबार नेपालको प्रधानमन्त्रीमा पाँचौपटक शेरबहादुर देउवा नियुक्त हुनुभएकामा बंगलादेशका प्रधानमन्त्री शेखहसिनाले हार्दिक बधाई ज्ञापन गर्दै कार्यकालको सफलताको कामना गर्नुभएको छ । साथै उहाँले ढाका भ्रमणका निम्ति आमन्त्रण गर्दै सहयोगका नयाँ क्षेत्रमा साझेदारीको प्रस्ताव गर्नुभएको छ ।

प्रधानमन्त्री देउवालाई पठाउनु भएको बधाई सन्देशमा बंगलादेशी प्रधानमन्त्रीले संसद्मा श्री देउवालाई प्राप्त अत्यधिक मत नेपाली जनता र नेपालको राजनीतिक नेतृत्वले गरेको उहाँमाथि गरेको विश्वास र भरोसाको प्रमाण भएको बताउनुभएको छ । निकटको छिमेकीको नाताले बङ्गलादेश र नेपालबीच सुमधुर सम्बन्ध रहेको चर्चा गर्दै उहाँले सन्देशमा त्यो सम्बन्ध बहुसमानता र एकअर्कालाई जोड्ने साझा सम्पर्कमा आधारित रहेको उल्लेख गर्नुभएको छ ।

बंगलादेश र नेपालबीच विविध क्षेत्रमा विद्यमान सहयोगलाई प्रधानमन्त्री देउवाको सक्षम नेतृत्वमा अझ सुदृढ तुल्याउन तथा उपयोग नगरिएका सहयोगका सम्भावित क्षेत्र पहिचान गरी द्विपक्षीय सहयोग एवम् सहकार्य घनिभूत हुने विश्वास व्यक्त गर्नुभएको छ ।

“हालै सम्पन्न राष्ट्रपिता शेख मुजिबर रहमानको जन्मशताव्दी तथा स्वततन्त्र बंगलादेशको स्वर्ण महोत्सव समारोहमा नेपालका राष्ट्रपतिबाट भएको राजकीय भ्रमणको अनुरागपूर्वक स्मरण गरेकी छु, राष्ट्रपिताको स्वर्ण बंगलादेश बनाउने सपना साकार पार्न अग्रसर हामी विकासशील अर्थतन्त्रमा रूपान्तरण भइसकेका छौँ, सन् २०४१ सम्ममा विकसित अर्थतन्त्रमा परिवर्तन हुनेछौँ”, आफ्नो देशले गरेको आर्थिक–सामाजिक विकासबाट लाभान्वित हुन नेपाललाई आह्वान गर्दै प्रधानमन्त्री हसिनाले पारस्परिक लाभका खातिर प्रधानमन्त्री देउवासँग निकट सम्पर्कमा रहेर काम गर्ने इच्छा व्यक्त गर्नुभएको छ ।

पचास वर्षअघि बंगलादेशको स्वतन्त्रता सङ्ग्रामका बेला नेपाली काङ्ग्रेसको नेतृत्वले गरेको सहयोग र समर्थनले प्रगाढ तुल्याएको दुई देशबीचको सम्बन्ध भविष्यमा अझ उन्नत हुने उहाँले सन्देशमा उल्लेख गर्नुभएको छ ।

प्रधानमन्त्री देउवालाई उहाँले उपयुक्त समयमा यथासक्य चाँडो बंगलादेश भ्रमणका निम्ति आमन्त्रण पनि सोही सन्देशमार्फत गर्नुभएको छ । प्रधानमन्त्री देउवाको सुख, सुस्वास्थ्य र सफलताका साथै नेपाली जनताको शान्ति, प्रगति र समृद्धिको कामना बंगलादेशका प्रधानमन्त्रीले गर्नुभएको छ ।

प्रतिक्रिया राख्नुहोस्

सम्बन्धित खबर

Back to top button