नेकपा (एमाले) का नेता तथा प्रतिनिधि सभा सदस्य डा. भीम रावलले निर्वाचनमा दलहरुबीच गठबन्धन गरेर जानु देशलाई सिद्धान्तहीन, आदर्शहीन र गन्तव्यहीन राजनीतितर्फ धकेल्ने प्रयासको आरोप लगाउनुभएको छ ।
मंसिर ४ गते प्रतिनिधिसभा र प्रदेशसभा निर्वाचनको घोषणा भएलगत्तै वर्तमान सत्ता गठबन्धनले चुनावी तालमेल गरेर जाने निर्णय गरेसंगै नेता डा. रावलले निर्वाचनमा गठबन्धन गरिनु संविधान विपरीत हुने भन्दै सो धारणा राख्नुभएको हो ।
शुक्रबार काठमाडौंमा आयोजित एक अन्तरक्रिया कार्यक्रममा नेता रावलले भन्नुभयो, “जनताको मत निश्चित विचारधारा, दर्शन र कार्यक्रमका आधारमा लिने संवैधानिक व्यवस्था भएकोले विपरीत सिद्धान्त भएका राजनीतिक दलहरुले तालमेल गर्नु गलत हो ।”
उहाँले अगाडि भन्नुभयो, “यस प्रकारको गठबन्धनले देशको राजनीतिलाई सिद्धान्तहीन, आदर्शहीन र गन्तव्यहीन दिशातर्फ धकेल्छ ।”
गठबन्धनले सिद्धान्तहीन, आदर्शहीन र गन्तव्यहीन राजनीतितर्फ देशलाई धकेल्ने चर्चा गर्दै भन्नुभयो- “जनताले जसलाई बहुमत दिन्छ त्यसले सरकार चलाउने हो” ।
आम निर्वाचनमा विपरीत सिद्धान्त भएका राजनीतिक दलहरुले तालमेल गर्ने कुरा संविधानको धारा २६९ को विरुद्ध रहेको पनि उहाँको दावी छ ।
नेता रावलले थप्नुभयो, “कसैले बहुमत ल्याएन भने समान राजनीतिक दृष्टिकोण, विचार, कार्यक्रम या कतिपय विषयमा समान धारणा भएका राजनीतिक दलले मिलेर संयुक्त सरकार गठन गर्न सकिन्छ ।”
प्रतिक्रिया राख्नुहोस्