निर्वाचनमा जानु प्रतिगमन हुँदैन : ओली

नेकपा एमालेका अध्यक्ष केपी शर्मा ओलीले निर्वाचनमा जानु प्रतिगमन नहुने बताउँदै आफ्नो सरकार भएको भए गत वैशाखमै निर्वाचन भइसकेको हुने बताउनुभएको छ ।

प्रतिनिधिसभाको यो कार्यकालको अन्तिम बैठकलाई सम्बोधन गर्दै उहाँले चुनावको घोषणा जुनसुकै रुपमा अग्रगामी र लोकतान्त्रिक प्रक्रिया हुने बताउँदै उहाँले यस्तो बताउनुभएको हो ।

बैठकमा सम्बोधन गर्दै प्रधानमन्त्री शेरबहादुर देउवाले अदालतले संसद पुनःस्थापना गरिदिएकाले आफूहरुको यहाँ भेट भएको बताउनुभएपछि अध्यक्ष ओलीले सो धारणा राख्नुभएको हो ।

सम्बोधनका क्रममा उहाँले प्रधानमन्त्री शेरबहादुर देउवा नेतृत्वको सरकार परमादेशबाटै बनेको पुनः दोहोर्याउँदै सरकार संविधान विपरित रहेको र यो प्रतिगमन भएको पनि दावी गर्नुभयो ।

उहाँले भन्नुभयो- “सरकार बनाएको परिवेश त छताछुल्ल भएकै छ । जे भए पनि अब हामी एउटा कोर्षमा गइसकेका छौं । निर्वाचनको मिति तोकिएको छ । यो प्रतिगमन होइन । तर, संविधानविपरित परमादेशबाट सरकार गठन हुनु चाहिं प्रतिगमन नै हो ।”

सम्बोधनका क्रममा अध्यक्ष ओलीले संसदको प्रारम्भमा निकै राम्रा काम भएको बताउनुभयो । प्रारम्भमा धेरै कानुन संसोधन गरेको, संघीयताका संरचना निर्माण गरेका, संघ, स्थानीय तह कसरी चलाउने भनेर संविधान अनुकुल कानुन र अन्य संरचना निर्माण गरेको बताउनुभयो ।

यस्तै, प्रदेशहरूको राजधानी तोक्ने, एउटा बाहेक बाँकीको नामाकरण लगायत काम निकै राम्रोसँग गरेको बताउनुभयो । साथै, भूकम्पपछिको पुनर्निर्माणमा पनि अत्यन्तै प्रभावकारी काम भएको बताउनुभयो ।

पूर्व प्रधानमन्त्री ओलीले निर्वाचन आयोग गठबन्धन सरकाले जता लतार्छ उतै लतारिने काम नगर्न र सरकारले पनि निर्वाचन प्रभावित पार्ने काम नगर्न चेतावनी पनि दिनुभयो ।