प्रधान न्यायाधीश जबरा आज अदालत जाने, बार अध्यक्ष मूल ढोकामै धर्ना बस्ने
प्रतिनिधिसभाको अन्त्यसंगै महाभियोग प्रमाणित नभएको दावी र तर्कसहित निलम्बनमा परेका प्रधानन्यायाधीश चोलेन्द्र शमशेर जबरा आज (असोज २)बाट सर्वोच्च अदालत फर्कने बताउनुभएको छ ।
![Cholendrta Bayan](https://www.nepaljapan.com/wp-content/uploads/2022/09/Cholendrta-Bayan-e1662277062517.jpg)
उहाँले आफूमाथिको महाभियोग प्रमाणित नभएको भन्दै आइतबारदेखि सर्वोच्च अदालत फर्कने भन्दै पत्र पठाउनुभएपछि उहाँलाई रोक्न नेपाल बार एसोसिएशनले मूल ढोकामै धर्ना दिने चेतावनी समेत दिएको छ ।
आइतबार विहान पत्रकार ऋषि धमलासँगको संक्षिप्त कुराकानीमा प्रधान न्यायाधीश जबराले आफूमाथि लगाइएको महाभियोग प्रमाणित नभएकाले आज ११ बजे अदालत गएर काममा फर्कने बताउनुभएको हो ।
जबरामाथि सत्तापक्षका ९८ जना सांसदले महाभियोग दर्ता गरेका थिए । लामो समयसम्म उक्त प्रस्ताव त्यतिकै राखेर हालै अघि बढाइएको थियो । हिजो राति १२ बजेबाट संसद्को कार्यकाल पनि समाप्त भएको छ ।
महाभियोग सिफारिश समितिले भने शनिबार राति ढिलै गरी भए पनि सभामुख अग्निप्रसाद सापकोटासमक्ष प्रतिवेदन बुझाएको थियो । समितिमा रहेका एमाले र लोसपाका सदस्यहरुले भने फरक मत राखेका छन् ।
यसबीच नेपाल बार एसोसिएसनका अध्यक्ष गोपालकृष्ण घिमिरेले संसद्ले ‘क्लिन चिट्’ नदिईकन प्रधानन्यायाधीश चोलेन्द्रशमशेर राणा सर्वोच्च अदालत फर्कन नमिल्ने जिकिर गर्दै राणा चोलेन्द्रशमशेर जबर्जस्ती सर्वोच्च अदालत नआउने बताउनुभएको छ ।
घिमिरेले भन्नुभयो, उहाँसँग निलम्बन फुकुवाको पत्र छैन । संसद्को क्लिन चिट नपाईकन कुन नैतिकताले अदालत प्रवेश गर्ने ? यो हँसीमजाकको विषय होइन । महाभियोगको प्रक्रिया चलिरहेको छ ।
नेपाली रेडियो नेटवर्कको कार्यक्रम ‘नेपाली बहस’का लागि पत्रकार ऋषि धमलासँग कुरा गर्दै अध्यक्ष घिमिरेले नेपाल बारले चोलेन्द्रशमशेरलाई सर्वोच्चको गेटमै रोक्ने चेतावनी पनि दिनुभयो ।
उहाँले भन्नुभयो, “एक व्यक्तिको स्वार्थका लागि सिंगो न्यायालयलाई थिलथिलो बनाइयो । बारले सदैव सिस्टमका लागि लडेको छ । यो व्यक्तिविरुद्धको आन्दोलन होइन । नेपाल बारले उहाँलाई रोक्छ । पहिलो पनि रोकेको थियो, अहिले पनि रोक्छ । हामी प्रोटेस्ट गर्छौं । आज नेपाल बारको अध्यक्ष नै सर्वोच्चको गेटमा धर्ना बस्छ ।”
प्रतिक्रिया राख्नुहोस्