गत साता बझाङको मस्टा गाउँपालिका–२ कि १२ वर्षीया सम्झना विश्वकर्माको हत्याको आरोपमा पक्राउ परेका अभियुक्त राजेन्द्र बोहराले बालिकाको बलात्कारपछि त्रिशूलले रोपेर हत्या स्वीकार गरेका छन् । बोहराले आफूले बलात्कारपछि ढुंगाले हानेरको र त्रिशुलले घोपेर हत्या गरेको स्वीकारेका हुन् ।
गत बुधबार साँझ करिब ४ बजे गोठमा गाईवस्तुलाई घाँस हाल्न घरबाट निस्किएकी उनी घर नर्फिर्कएपछि खोजी गर्दा राति करिब ९ः१५ बजे आफन्तले बालिकाको शव भेटेपछि प्रहरीलाई खबर गरेका थिए ।
घटना भएको राति नै प्रहरीले मस्टा गाउँपालिका–२ का राजेन्द्र बोहरालाई पक्राउ गरेको थियो । उनीमाथि जबरजस्ती करणी र कर्तव्य ज्यानमा मुद्दा दर्ता भएको छ । बुधबार साँझ करिब ४ बजेदेखि ५ बजेको बिचमा बालिकामाथि बलात्कार भएको र घटना बाहिर आउने डरले हत्या गरिएको प्रहरीले जनाएको छ ।
सुदूरपश्चिम प्रदेश प्रहरी कार्यालयका प्रवक्ता प्रहरी वरिष्ठ उपरीक्षक मुकेश कुमार सिंहका अनुसार बोहराले ढुंगाले हानेर र त्रिशूल रोपेर बालिकाको हत्या गरेको स्वीकारेका छन् । हत्याको स्वीकार गरिसकेका बोहरा यसअघि पनि बिभिन्न आपराधिक क्रियाकलापमा संलग्न रहेको प्रहरीको भनाइ छ ।
जिल्ला प्रहरी कार्यालय बझाङका अनुसार साउन २९ गते सोही ठाउँकी १३ वर्षीया बालिकालाई समेत बोहराले बलात्कार गरेका थिए । तर, ३१ गते आफन्तहरूसँग बसेर मिलापत्र गरिएको थियो । बोहराले गल्ती भएको भन्दै ५०० रुपैयाँ राखेर पीडित बालिकाको खुट्टा ढोगेपछि मिलापत्र गरेको प्रहरी वरिष्ठ उपरीक्षक सिंहले जानकारी दिनुभयो ।
प्रतिक्रिया राख्नुहोस्