प्रधानमन्त्री केपी शर्मा ओलीका राजनीतिक सल्लाहकार, प्रेस सल्लाहकार, परराष्ट्र सल्लाहकार तथा स्वकीय सचिवलाई कोरोना संक्रमण पुष्टि भए लगत्तै त्यहाँको सुरक्षामा खटिएका ६३ जना सुरक्षाकर्मीमा पनि संक्रमण देखिएको छ । सल्लाहकार र सुरक्षाकर्मीसहित बालुवाटारका ६७ जनामा संक्रमण पुष्टि भएको छ ।
समाचार अनुसार शुक्रबार र शनिबारसम्ममा नेपाली सेना, सशस्त्र प्रहरी र नेपाल प्रहरीका गरी ६३ जना सुरक्षाकर्मीमा कोरोना संक्रमण देखिएको हो । संक्रमण देखिएकामध्ये सबभन्दा बढी २८ जना नेपाली सेनाका छन् ।
सैनिक जनसम्पर्क तथा निर्देशनालयका अनुसार दुई दिनको अवधिमा यी सुरक्षाकर्मीलाई कोरोना संक्रमण देखिएको हो । उनीहरूको सम्पर्कमा रहेका अन्यको क्रमशः कन्ट्याक्ट ट्रेसिङ भइरहेको छ ।
प्रधानमन्त्री निवासमा नेपाली सेनाको एक गुल्म खटिएको छ । प्रमुख सेनानीको नेतृत्वमा सेनाको सुरक्षा छ । नारायणहिटी दरबारबाट प्रधानमन्त्री कार्यालयमा सेना खटाइएको थियो । अब यो पूरै गुल्मलाई परिवर्तन गर्ने सेनाको तयारी रहेको सैनिक प्रवक्ता सहायक रथी सन्तोषवल्लभ पौडेलले बताउनुभएको छ ।
उहाँका अनुसार नयाँ सुरक्षाकर्मी पठाउँदा दर्जा मिलाउनुपर्ने हुन्छ, त्यो काम भइरहेको छ ।पौडेलका अनुसार प्रधानमन्त्री तथा उहाँको सचिवालयसँग नजिक नरहेको जनशक्तिमा कोरोना देखिएको छ ।
प्रहरी प्रवक्ता कुबेर कडायतले नेपाल प्रहरीबाट खटिएका १७ जनामा कोरोना संक्रमण देखिएको बताउँदै शुक्रबार र शनिबारको परीक्षण रिपोर्टमा यति जनामा कोरोना संक्रमण देखिएको जनाउनुभयो ।
प्रधानमन्त्री निवास सुरक्षामा प्रहरी नायब उपरीक्षकको नेतृत्वमा नेपाल प्रहरीको टोली खटिएको छ । संक्रमित प्रहरीको ठाउँमा सुरक्षा सेवा निर्देशनालयले अन्य जनशक्ति खटाउने तयारी गरिरहेको कडायतले बताउनुभयो ।
सशस्त्र प्रहरी प्रवक्ता सशस्त्र प्रहरी नायब महानिरीक्षक राजु अर्यालले सशस्त्र प्रहरीका १८ जनामा कोरोना संक्रमण देखिएको जनाउँदै शुक्रबारको परीक्षणमा यतिको संख्यामा सशस्त्र प्रहरीलाई कोरोना संक्रमण देखिएको जानकारी दिनुभयो ।
उहाँले पनि पिसिआर परीक्षण गरेर नयाँ सुरक्षाकर्मी पठाउने तयारी भैरहेको बताउँदै संक्रमित सुरक्षाकर्मीहरूको कन्ट्याक्ट ट्रेसिङ जारी रहेको जानकारी दिनुभयो ।
