कैयौंपटक सांसद निर्वाचित भएर पनि अझै उम्मेदवारीको आकांक्षा राख्ने नेताहरुको बीचमा पूर्व प्रधानमन्त्री डा. बाबुराम भट्टराईले आफू संसदीय राजनीतिबाट टाढा रहने बतउँदै आगामी मङ्सिर ४ गते हुने प्रतिनिधि सभा निर्वाचनमा उम्मेदवार नबन्ने बताउनुभएको छ ।
नेपाल समाजवादी पार्टीका अध्यक्ष डा. भट्टराईले राजनीति जनता र समाजको सेवाका निम्ति गरिने स्वेच्छिक कर्म भएको हुँदा संसद् बाहिरबाट पनि जनताको सेवा गर्न सकिने उहाँले स्पष्ट पार्दै सो घोषणा गर्नुभएको हो ।
सोमवार नेपाल न्यून एजेन्सीसँग कुराकानी गर्दै उहाँले आफू संसदीय राजनीतिबाट टाढा बस्ने बताउनुभएको हो । उहाँ अघिल्लो प्रतिनिधि सभामा गोरखा–२ बाट निर्वाचित हुनुभएको थियो ।
नेताहरु जसरी पनि संसदमा पुग्ने र पाएसम्म कार्यकारी पद लिने प्रवृत्तिले देशमा ठूलो विकृति र विसङ्गति आएको बताउँदै डा. भट्टराईले सदन बाहिरबाट गरिने कर्म पनि राजनीति भएकाले आफूले उपयुक्त समय आएकाले संसदीय राजनीति नगर्ने निर्णय लिएको बताउनुभयो ।
उहाँले भन्नुभयो, ‘सक्रिय राजनीति गर्ने मान्छेले चुनाव नलड्ने यो नै रोचक प्रश्न हो । किनकि राजनीति भनेको चुनाव मात्रै हो, सत्ता मात्रै हो भन्ने जुन पर्न गयो, खासगरी ढिलो लोकतान्त्रीकरण भएको नेपालमा यो अत्यन्त विडम्बनापूर्ण कुरा हो ।
उहाँले राजनीति भनेको समाज रुपान्तरणको निम्ति गरिने, जनताको र समाजको सेवाको निम्ति गरिने स्वेच्छिक कर्म भएको पनि बताउनुभयो ।
प्रतिक्रिया राख्नुहोस्