विश्वव्यापी महामारीका रुपमा फैलिइरहेको कोभिड–१९ का कारण सबभन्दा बढी जोखिममा रहेका बालबालिकाहरुको स्वास्थ्य सुरक्षा प्रदान गर्ने उद्देश्यले काठमाडौंको गोकर्णेश्वर नगरपालिका वडा नं ९ आरुबारीस्थित अरुणोदय उच्च माध्यमिक विद्यालयलाई सोही विद्यालयका पूर्व विद्यार्थीहरुले स्वास्थ्य सुरक्षा सामग्री प्रदान गरेका छन् । बिहिबार विद्यालयमा आयोजित अनौपचारिक कार्यक्रमकाबीच अरुणोदय पूर्व विद्यार्थी समाजले ती सामग्री हस्तान्तरण गरेको हो ।
एभरेष्ट पेपर उद्योग र नवोध्या ट्रेडर्सका अध्यक्ष अमनबहादुर खड्काले उपलब्ध गराउनुभएको ती सामग्री सुरुमा खड्काले समाजका अध्यक्ष पौडेललाई हस्तान्तरण गर्नुभएको थियो भने लगत्तै विद्यालयलाई हस्तान्तरण गरिएको हो ।
गोकर्णेश्वर नगरपालिका वडा नं. ९ का अध्यक्ष राजिव थापा, समाजका अध्यक्ष त्रिलोचन पौड्याल, उपाध्यक्ष रुपक थापा, सचिव यादब देवकोटा, सदस्यहरु सुरेश थापा र किरण पण्डित क्षेत्रीले विद्यालयका प्रधानाध्यापक कृष्णप्रसाद नेपाललाई ती सामग्री हस्तान्तरण गर्नुभएको हो ।
कार्यक्रममा विद्यालयका प्रधानाध्यापक नेपालले हाम्रो भविष्य आजका सुरक्षित र स्वस्थ बालबालिका नै भएकाले उनीहरुको स्वास्थ्यका लागि पूर्व विद्यार्थीहरुले गरेको सहयोग अमूल्य रहेको बताउनुभयो । उहाँले पूर्वीय मान्यता अनुसार आफूले शिक्षा आर्जन गरेको गुरुवा शिक्षाललाई गुरुदक्षिण दिने चयन भएको स्मरण गर्दै पूर्व विद्यार्थीहरुले अहिलेको समयमा जे आवश्यक छ त्यही सामग्री प्रदान गरेर गुरुदक्षिण तिरेको धारणा राख्नुभयो ।
समाजका अध्यक्ष त्रिलोचन पौड्यालले महामारीको अहिलेको समयमा स्वास्थ्य नै सबैभन्दा ठूलो धन भएकाले आफू पढेको विद्यालयका बालबालिकालाई सुरक्षित राख्न समाजले सानो प्रयास गरेको बताउनुभयो । उहाँले स्वास्थ्य सुरक्षा सामग्री उपलब्ध गराउने खड्कालाई विशेष धन्यवाद दिनुभयो ।
सामाजिक दूरी कायम राख्नुपर्ने कारणले अनौपचारिक रुपमा गरिएको कार्यक्रममा दाता खड्काले आफूले समाजलाई केही गर्नुपर्छ भन्ने उद्देश्यले सहयोग गरेको बताउँदै आगामी दिनमा पनि यस्तो सहयोग गरिरहने जनाउनुभयो ।
कार्यक्रममा समाजका सचिव यादब देवकोटाले बालबालिकालाई सुरक्षित तवरले पठनपाठन गराउनु अहिलेको पहिलो कर्तव्य भएकाले समाजले स्वास्थ्य सुरक्षा सामग्री हस्तान्तरण गरेको बताउँदै यसबाट विद्यालयलाई केही हदसम्म लाभ हुने बताउनुभयो ।
स्मरणीय के छ भने कोभिड १९ को महामारीका कारण स्वास्थ्य सुरक्षा मापदण्ड अपनाएर संचालन भएका केही विद्यालयहरुमध्येमा अरुणोदय माध्यमिक विद्यालय पनि पर्दछ । सो विद्यालयमा अहिले प्राथमिकदेखि उच्च माध्यमिकसम्मका कक्षाहरु तीन चरणमा संचालन भैरहेका छन् ।
प्रतिक्रिया राख्नुहोस्