नेकपा एमालेले राष्ट्रिय प्रजातन्त्र पार्टीका अध्यक्ष कमल थापालाई निर्वाचनमा सघाउने भएको छ । आगामी निर्वाचनमा थापा मकवानपुर क्षेत्र नं. १ बाट प्रतिनिधिसभामा प्रत्यक्ष उम्मेदवार बन्ने हुनुभएको छ ।
भारतले नाकाबन्दी लगाएको समयमा केपी ओली नेतृत्वको सरकारका उपप्रधान तथा परराष्ट मन्त्रीको जिम्मेवारी कुशलतापूर्वक निर्वाह गर्दै नाकाबन्दीको सामना गर्न महत्वपूर्ण भूमिका गर्नुभएका थापालाई निर्वाचनमा एमालेले सघाउने भएको छ ।
एमाले अध्यक्ष केपी शर्मा ओली र राप्रपा अध्यक्ष थापाबीच यस विषयमा समझदारी बनेको छ । थापाले ओलीसंग भएको समझदारीपत्रसहितको फोटो सार्वजनिक गर्नुभएको छ ।
थापाले ट्वीट गर्दै लेख्नुभएको छ- “नेकपा (एमाले)को सहयोगमा मंसिर ४ मा हुने प्रतिनिधिसभा निर्वाचनमा मकवानपुर क्षेत्र नं १ बाट उमेदवार हुँदैछु । सद्भाव र सहकार्यको लागि नेकपा (एमाले)लाई धन्यवाद । राष्ट्रियताको संरक्षण, लोकतन्त्रको सुदृढीकरण, सुशासन र आर्थिक समृद्धिको निम्ति ईमान्दारीपूर्वक कामगर्ने प्रतिबद्धता व्यक्त गर्दछु ।”
प्रतिक्रिया राख्नुहोस्