माल्दिभ्समा जारी दक्षिण एसियाली फुटबल (साफ च्याम्पियनसीप)मा उच्च प्रदर्शन गरेर उपाधीको होडमा रहेको नेपाल कमजोर प्रदर्शन गरिरहेको सातपटकको विजेता भारतबीच आज राति खेल हुँदैछ ।
मालेस्थित नेशनल स्टेडियममा नेपाली समयअनुसार राती ९ः४५ बजे खेल सुरु हुनेछ । प्रतियोगितामा अहिलेसम्म दुई खेल खेल्दा नेपाल र भारत फरक स्थितिमा छन् ।
५ राष्ट्र सम्मिलित प्रतियोगितामा राउण्ड रोविन लिगका आधारमा खेल भइरहँदा नेपालले सुरुवाती दुई खेल जितेर ६ अंक जोडेको छ र फाइनल पुग्ने सम्भावना बलियो बनाएको छ । अर्कोतर्फ भारतले सुरुवाती दुई खेल जित्न सकेन । लगातार दुई बराबरीबाट भारतको २ अंक छ ।
यस्तो अवस्थामा दुवै टोलीलाई आजको खेल महत्वपूर्ण छ । नेपालले भारतलाई पराजित गरेमा एक खेल खेल्नुअघि नै फाइनल पुग्नेछ । यस्तोमा नेपाल साफ च्याम्पियनसिपमै पहिलो पटक फाइनल पुग्नेछ । बराबरी वा पराजित भएमा भने नेपालले अन्तिम खेलसम्म कुर्नुपर्नेछ । उता भारतलाई जित निश्चित रुपमा आवश्यक छ ।
आजै घरेलु टिम माल्दिभ्स र श्रीलंकाबीच पनि खेल हुनेछ । ४ः४५ मा हुने उक्त खेल माल्दिभ्सले जितेमा र भारत नेपालसँग पराजित भएमा भने भारत फाइनल होडबाट बाहिरिनेछ ।
यसअघि नेपालले पहिलो खेलमा माल्दिभ्सलाई १-० र श्रीलंकालाई ३-२ ले पराजित गरेको थियो । भारतले भने पहिलो खेलमा बंगलादेशसंग १-१ र त्यसपछि श्रीलंकासँग गोलरहित बराबरी खेलेको थियो ।
प्रतिक्रिया राख्नुहोस्