करोडौँ ठगीका आरोपित नेपाल इञ्जिनीयरिङ कलेज भक्तपुरका तत्कालीन अध्यक्ष रामेछापको मन्थली घर भई काठमाडौँको चण्डोल बस्ने ६४ वर्षीय लम्बोदरकुमार न्यौपाने पक्राउ परेका छन् ।
न्यौपानेमाथि सम्पत्ति शुद्धीकरणसम्बन्धी कसुरमा अनुसन्धान भइरहेको छ । यसअघि अख्तियार दुरुपयोग अनुसन्धान आयोगले दायर गरेको घुस रिसवतसम्बन्धी मुद्दाको कसुरमा उनी धरौटीमा छुटेका थिए । २ वर्षअघि न्यौपानेसँग ७८ लाख रुपैयाँ घुस लिएको प्रमाण सार्वजनिक भएपछि अख्तियार दुरुपयोग अनुसन्धान आयोगका आयुक्त राजनारायण पाठकले पद छोड्नुपरेको थियो ।
नयौपानेलाई विभिन्न प्रपञ्च रचेर भक्तपुर चाँगुनारायण नगपालिका– ४ स्थित नेपाल इञ्जिनीयरिङ कलेजको सम्पत्तिमा नोक्सानी पुर्याइ ठगी गरेको आरोपमा प्रहरीको केन्द्रीय अनुसन्धान ब्युरो (सिआइबी) को टोलीले बुधबार काठमाडौँको चण्डोलबाट पक्राउ गरेको हो ।
उनी लुकीछिपी बसेको अवस्थामा पक्राउ गरिएको ब्युरोका प्रमुख प्रहरी नायब महानिरीक्षक सहकुलबहादुर थापाले जानकारी दिनुभयो ।
न्यौपानेसमेतको संलग्नतामा लेखा परीक्षणबाट खुल्न आएको रु आठ करोड २१ लाख ५३ हजार बेरुजुसहित रु २३ करोड १० लाख ठगी गरेको खुल्न आएको उहाँले बताउनुभयो । उनीमाथि ठगीसम्बन्धी कसुरमा आवश्यक अनुसन्धान कार्य अगाडि बढाइएकोसमेत थापाले जानकारी दिनुभयो ।
विसं २०५१ मा सात जना रही मुनाफारहित उद्देश्यले उक्त संस्था स्थापना भएको थियो । सञ्चालकले नै संस्थामा ठगी गरेको खुल्न आएपछि शिक्षा, विज्ञान तथा प्रविधि मन्त्रालयको गत वर्षको निर्णयले सञ्चालक समितिलाई भङ्ग गरी चाँगुनारायण नगरपालिकाका प्रमुखको अध्यक्षतामा नौ सदस्यीय सञ्चालक समिति बनाएको थियो ।
प्रहरीका अनुसार काम अनुसार यसअघि विसं २०७३ मा सञ्चालक समितिको बैठकले जनही रु एक करोड ५० लाख रकम बिल भर्पाई पेश गर्न नपर्ने गरी लिएको खुल्न आएको छ । कलेजबाट लिएको रकमले किनेको गाडी तत्कालीन अध्यक्ष न्यौपानेले आफ्नो नाममा दर्ता गरेकोसमेत सिआइबीले जनाएको छ ।
उनीमाथि कलेजको लेटर प्याड र छापको दुरुपयोग गरी खर्च नै नभएको पैसा खर्च भएको भनी रू ५७ लाख ५० हजार रकम झिकेको आरोप पनि छ । उनले काल्पनिक शीर्षक बनाई सादा कागजमा हस्ताक्षर गरी बिल भर्पाई नचाहिने गरी आफ्नो कार्यकालको विभिन्न मितिमा रकम झिकी ठगी गरेका खुल्न आएको छ ।
प्रतिक्रिया राख्नुहोस्