प्रमुख श्रम गन्तव्य मुलुकमा कोरोना कहर जारी रहेको भए पनि चालू आर्थिक वर्षको चार महिनामा कूल रु तीन खर्ब ३७ अर्ब ७२ करोड बराबरको विप्रेषण स्वदेशमा भित्रिएको छ । नेपाल राष्ट्र बैंकले आज चालू आवको कात्तिक मसान्तसम्मको मुलुकको आर्थिक विवरण सार्वजनिक गर्दै विप्रेषण आप्रवाहमा वृद्धि भएको जनाएको हो ।
प्रमुख श्रम गन्तव्यमा कोरोना महामारी जारी रहेको अवस्थामा पनि विप्रेषण आप्रवाहमा उल्लेख्य वृद्धि भएको केन्द्रीय बैंककोे विवरणमा समावेश छ । अघिल्लो वर्षको सोही अवधिमा विप्रेषण आप्रवाह २.८ प्रतिशतले घटेको थियो । अमेरिकी डलरमा विप्रेषण आप्रवाह ६.४ प्रतिशतले वृद्धि भई २ अर्ब ८५ करोड पुगेको छ ।
अघिल्लो वर्ष यस्तो आप्रवाह १.९ प्रतिशतले घटेको थियो । समीक्षा अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) लिने नेपालीको सङ्ख्या ७५.८ प्रतिशतले कमी आई १९ हजार २५१ मात्रै रहेको छ ।
अघिल्लो वर्षको सोही अवधिमा यस्तो सङ्ख्या ५.६ प्रतिशतले बढेको थियो । वैदेशिक रोजगारीका लागि पुनः श्रम स्वीकृति लिने नेपालीको सङ्ख्या समीक्षा अवधिमा ६७.९ प्रतिशतले कमी आई २५ हजार ९३१ रहेको छ । अघिल्लो वर्षको सोही अवधिमा यस्तो सङ्ख्या ९.१ प्रतिशतले बढेको थियो । समीक्षा अवधिमा खुद ट्रान्सफर ८.८ प्रतिशतले वृद्धि भई रु तीन खर्ब ७३ अर्ब चार करोड पुगेको छ । अघिल्लो वर्षको सोही अवधिमा यस्तो ट्रान्सफर २.९ प्रतिशतले घटेको थियो ।
प्रतिक्रिया राख्नुहोस्