आइतबार जापानको आम चुनावमा प्रधानमन्त्री साने ताकाइचीको लिबरल डेमोक्रेटिक पार्टी (एलडीपी) ले भारी जित हासिल गरेको छ। बीबीसीका अनुसार, एलडीपी गठबन्धनले ४६५ सिटमध्ये ३५२ सिट जितेको छ । एलडीपीले एक्लैले ३१६ सिट जितेको छ, जुन बहुमतको लागि आवश्यक २३३ भन्दा धेरै बढी हो ।
यसलाई पार्टीको अहिलेसम्मको सबैभन्दा ठूलो जित मानिन्छ । यसअघि, १९८६ मा, पार्टीले ३०० सिट जितेको थियो । चुनाव जितेपछि, ताकाइचीले जापानलाई बलियो बनाउन र समृद्ध बनाउन काम गर्ने बताउनुभएको छ ।
उहाँले आवश्यक परेमा विपक्षीसँग मिलेर काम गर्ने पनि बताउनुभयो । यो जितले प्रधानमन्त्री ताकाइचीलाई माथिल्लो सदनमा विपक्षीको नियन्त्रण भए पनि कानून पारित गर्ने शक्ति दिनेछ ।
प्रधानमन्त्री मोदीले ताकाइचीलाई उहाँको विजयमा बधाई दिए । उहाँले एक पोस्टमा लेख्नुभयो, “मलाई विश्वास छ कि तपाईंको सक्षम नेतृत्वमा, भारत-जापान मित्रतालाई हामी नयाँ उचाइमा पुर्याउनेछौं।”
त्यस्तै अमेरिकी राष्ट्रपति डोनाल्ड ट्रम्पले सामाजिक सञ्जालमार्फत ताकाइचीलाई समर्थन जनाउँदै बधाई दिनुभएको । ट्रम्पले ताकाइचीलाई ‘पूर्ण समर्थन’ रहने बताउनुभएको छ ।
सत्तारूढ लिबरल डेमोक्रेटिक पार्टी (एलडिपी) ले आर्थिक सहयोग र धार्मिक घोटालाका कारण दबाब झेले पनि ताकाइचीले त्यसलाई उल्ट्याउने विश्वाससहित मध्यावधि निर्वाचनको आह्वान गर्नुभएको थियो ।
ताकाइची लोकप्रिय नेताका रूपमा चिनिनुहुन्छ । विगत सात दशकदेखि जापानमा शासन गर्दै आएको एलडिपी हाल विश्वासको सङ्कटमा परे पनि उहाँले दक्षिणपन्थी एजेन्डामार्फत अर्थतन्त्र र सैन्य क्षमता बलियो बनाउने लक्ष्य राख्नुभएको छ । चीनसँग बढ्दो तनावका बीच जापानको सुरक्षा क्षमता विस्तार गर्नु र प्रमुख अमेरिकी सहयोगीसँगको सम्बन्ध थप सुदृढ बनाउनु उहाँका प्रमुख प्राथमिकता हुन् ।
अक्टोबरमा जापानको पहिलो महिला प्रधानमन्त्रीका रूपमा पदभार ग्रहण गर्नुभएकी अल्ट्राकन्जरभेटिभ ताकाइचीले ‘काम गर्ने, काम गर्ने, काम गर्ने’ भन्ने नारासहित सक्रिय नेतृत्वको प्रतिज्ञा गर्नुभएको छ । उहाँको स्पष्ट र कडा शैलीले युवा मतदातामाझ पनि समर्थन पाएको देखिन्छ ।
ताकाइचीको यस ठूलो जितले जापानको सुरक्षा, आप्रवासन र अन्य नीतिहरूलाई दक्षिणतर्फ उल्लेखनीय रूपमा मोड्न सक्ने अनुमान गरिएको छ ।
उहाँले सैन्य क्षमता विस्तार, हतियार निर्यातसम्बन्धी प्रतिबन्ध हटाउने र युद्धपछिको शान्तिवादी नीतिबाट क्रमशः टाढा जाने वाचा गर्नुभएको छ । साथै विदेशीहरूमाथि कडा नीति, जासुसीविरोधी उपाय र रक्षा खर्च वृद्धि गर्ने योजना पनि प्रस्तुत गर्नुभएको छ, जसबारे नागरिक अधिकार कमजोर पर्न सक्ने चिन्ता विज्ञहरूले व्यक्त गरेका छन् ।
आइतबारको मतदान टोकियोसहित देशभर ताजा हिमपातका बीच सुरु भएको थियो । पछिल्ला हप्ताहरूमा उत्तरी जापानमा परेको भारी हिमपातले सडक अवरुद्ध हुनुका साथै जनजीवन प्रभावित भएको छ ।
प्रतिक्रिया राख्नुहोस्