भूमिगत कालमा वामपन्थी राजनीति गर्नेहरु समाजमा परिवर्तन ल्याउने भन्दै न्यून खर्चमा सीमित व्यक्तिहरुको उपस्थितिमा विवाह गर्दथे र त्यसलाई जनवादी विवाह भनिन्थ्यो । आजभोलि के वामपन्थी, के समाजवादी सबै सम्पन्न भएपछि विवाहमा धनको तुजुक देखाउने होड बढिरहेका बेला नेपाली काँग्रेसका नेता कृष्णप्रसाद सिटौलाले आफ्ना छोराको विवाह भने जनवादी शैलीमा गर्नुभएको छ ।
नेता सिटालाले आफनो छोरा श्यामको विवाहमा जम्मा सातजना जन्ती लिएर जानुभो भने भोजको रकम स्थानीय तहलाई प्रदान गर्नुभएको छ । नेता सिटौलाले सोमबार झापाको बाह्रदशी, कचनकवल र हल्दिवारी गाउँपालिकासहित भद्रपुर तथा विर्तामोड नगरपालिकालाई रु पाँँच लाख प्रदान गर्नुभएको हो ।
आइतबार सिटौलाले आफ्ना छोरा श्यामको विवाह विर्तामोड निवासी ओमकृष्ण विमलीकी जेठी छोरी मनिषासँग दिवालग्नमा गराउनुभएको थियो ।
नेता सिटौला लकडाउनको पालना गर्दै बेहुला श्याम, आफ्ना दुई अङ्गरक्षक र अन्य तीन गरी सात जना मात्र जन्ती लिएर बेहुलीको घर पुग्नुभएको थियो । उता बेहुली पक्षका पनि १५ जना मात्र थिए । बेहुली पक्षले घरमा बेहुला र जन्तीलाई स्वागत गर्न १५ जनालाई मात्र उपस्थिति गराएको थियो ।
विश्व स्वास्थ्य सङ्गठन र नेपाल सरकारले कोरोना भाइरस नियन्त्रण तथा रोकथामका लागि अपनाएको सुरक्षा अवलम्बन गर्दै नेता सिटौलाले आफ्ना छोराको विवाह सम्पन्न गरेपछि आफ्नो निर्वाचन क्षेत्रमा रहेका विपन्न, असहाय तथा मजदुर वर्गलाई राहत पुर्याउने उद्देश्यले पाँच वटा पालिकालाई रु पाँच लाख सहयोग गर्नुभएको हो ।
छोराबुहारीको इच्छानुसार नेता सिटौलाले विवाहभोजमा गरिने खर्च स्थानीय तहलाई हस्तान्तरण गर्नुभएको काँग्रेस नेता नवीन विमलीले जानकारी दिनुभयो । सिटौलाले बाह्रदशी, हल्दिबारी, कचनकवल गाउँपालिका र भद्रपुर नगरपालिकालाई एक/एक लाख प्रदान गर्नुभएको थियो भने भद्रपुर नगरपालिका–१० र विर्तामोड नगरपालिका–१० लाई ५०/ ५० हजार सहयोग गर्नुभएको हो ।
प्रतिक्रिया राख्नुहोस्