राष्ट्रको अभिभावकका रूपमा भूमिका निर्वाह गरिरहेछु : राष्ट्रपति पौडेल

ठूला दलहरुले प्रतिनिधिसभा विघटन गरी गैरदलीय सरकार गठन गर्नु असंवैधानिक भन्दै बिरोध गरिरहेका बेला राष्ट्रपति रामचन्द्र पौडेलले जेनजी आन्दोलनपछि आफूले राष्ट्रको अभिभावकको रूपमा भूमिका निर्वाह गरिरहेको बताउनुभएको छ ।

संविधान दिवसका अवसरमा राष्ट्रपति भवन शितल निवासमा आयोजित चियापान समारोहलाई सम्बोधन गर्दै राष्ट्रपति पौडेलले अहिलेको अन्तरिम सरकार आम सहमतिको आधारमा बनाएको बताउँदै सो धारणा राख्नुभएको हो ।

उहाँले जेनजी आन्दोलनपछि उत्पन्न परिस्थितिमा प्रतिनिधिसभाबाट मन्त्रिपरिषद् गठन गर्ने कुनै उपाय बाँकी नरहेकोले आम सहमतिबाट यो कदम चालिएको बताउँदै ६ महिनाभित्र प्रतिनिधिसभाको चुनाव सम्पन्न गर्न सबै जाग्न आव्हान गर्नुभयो ।

राष्ट्रपति पौडेलले नयाँ जनादेशले लोकतन्त्रलाई थप संस्थागत गर्ने विश्वास व्यक्त गर्दै भन्नुभयो, “नयाँ जनादेशले लोकतन्त्रलाई थप संस्थागत गर्दै मुलुकको आगामी बाटो तय गर्नेछ भन्ने मेरो दृढ विश्वास छ । अहिले बनेको अन्तरिम सरकारले राष्ट्रिय क्षतिको पुनर्निर्माण गर्दै ६ महिनामा निर्वाचन सम्पन्न गरी जनप्रतिनिधिमूलक संस्थालाई सत्ता हस्तान्तरण गर्नेछ ।”

समयमा निर्वाचन सम्पन्न गर्नु सबै नेपालीको अहिलेको मुख्य कार्यभार रहेकोमाा जोड दिंदै राष्ट्रपति पौडेलले भन्नुभयो, “यो घडीमा म सबै राजनीतिक दल, मुलुकको शासन तथा व्यवस्थापनमा आबद्ध निकाय, बौद्धिक समुदाय र नागरिक समाजलाई असमझदारी र द्वन्द्वरहित भएर सहमति र सहकार्यका साथ निर्वाचनको सफलताको लागि क्रियाशील हुन आह्वान गर्दछु ।”

जेनजी आन्दोलनका क्रममा भदौ २३ र २४ गते भएको अकल्पनीय मानवीय र भौतिक क्षतिप्रति दुःख व्यक्त गर्दै राष्ट्रपति पौडेलले आफूले राष्ट्रको अभिभावकको रूपमा भूमिका निर्वाह गरिरहेको भन्दै अहिलेको अप्ठ्यारो स्थितिबाट पार लगाउन सबै मिलेर काम गर्नुपर्ने स्पष्ट पार्नुभयो ।

‘नवपुस्ताको र जनचाहना अनुसार तत्कालीन समयमा जे जति गर्न सकिन्थ्यो सबैले मिलेर गरेको स्पष्ट पार्दै उहाँले भन्नुभयो, ‘मुलुक फेरि एकपटक परिवर्तनको नवमार्गमा प्रवेश गरेको छ ।’

चियापान समारोहमा उपराष्ट्रपति, सभामुख, प्रधान न्यायाधीश, विभिन्न दलका शीर्ष नेता, नेपालस्थित कूटनीतिक नियोगका प्रमुखहरुसहित जेनजी प्रतिनिधिहरू सहभागी थिए ।