बलिउड अभिनेता धर्मेन्द्रको ८९ वर्षको उमेरमा निधन भएको छ । सोमबार अपराह्न उनको आफ्‍नै निवासमा निधन भएको दैनिक भास्कर लगायत विभिन्न भारतीय सञ्‍चारमाध्यमहरूले जनाएका छन् ।

उनको अन्तिमसंस्कारका लागि अमिताब बच्चन, सलमान खान, संजय दत्त, अमिताभ बच्चन र आमिर खान लगायत धेरै सेलिब्रेटीहरू उपस्थित थिए । प्रधानमन्त्री नरेन्द्र मोदीले वरिष्ठ अभिनेता धर्मेन्द्रको मृत्युलाई एक युगको अन्त्यको संकेतको रूपमा वर्णन गर्नुभएको छ ।

उहाँले एक्समा लेख्नुभएको छ, “धर्मेन्द्र जीको निधनले भारतीय सिनेमामा एक युगको अन्त्य भएको छ। उहाँ एक प्रतिष्ठित चलचित्र व्यक्तित्व हुनुहुन्थ्यो, एक उल्लेखनीय अभिनेता जसले आफूले निभाएको हरेक भूमिकामा गहिराइ र आकर्षण ल्याए। विविध भूमिकाहरू चित्रण गर्ने उनको अद्वितीय शैलीले अनगिन्ती मानिसहरूको हृदय छोयो । धर्मेन्द्र जीलाई उहाँको सरलता, नम्रता र न्यानोपनको लागि उत्तिकै प्रशंसा गरिन्थ्यो। यो शोकको घडीमा उहाँको परिवार, साथीभाइ र असंख्य प्रशंसकहरूप्रति मेरो समवेदना। ओम शान्ति।”

यसअघि धर्मेन्द्रको निवासमा एम्बुलेन्स सहितका गाडी र घर बाहिर सुरक्षा बढाइएको थियो । धर्मेन्द्रको केही समयदेखि श्वासप्रश्वासमा समस्या देखिएको थियो । उनलाई गत हप्ता मुम्बईको ब्रीच क्यान्डी अस्पतालमा भर्ना गरी भेन्टिलेटरमा राखी उपचार गरिएको थियो ।

त्यसक्रममा उनको मृत्यु भएको खबर पनि मिडियामा आएको थियो, जसलाई उनको परिवारले अस्वीकार गरेका थिए ।

अभिनेता धर्मेन्द्रको मृत्युको खबर फैलिएपछि छोरी इशाको कडा आपत्ति

सन्नी देओलको आग्रह– “कृपया अफवाह नफैलाउनुहोस्”