बाबर हायातको शानदार अविजित शतकको मद्दतमा मलेसियामा जारी एसिसी प्रिमियर कपमा हङकङले नेपाल सामू जितको लागि २६२ रनको लक्ष्य प्रस्तुत गरेको छ ।
क्वालालाम्पुरस्थित बायुमास ओभलको मैदानमा टस जितेर पहिले ब्याटिङ गरेको हङकङले निर्धारित ५० ओभरमा ७ विकेट गुमाएर २६१ रन बनाएको हो । हङकङले बाबरले १२७ बलमा ७ चौका र ७ छक्का मद्दतमा अविजित रहँदै ११७ रनकोशतकीय पारी खेले भने एहसान खान ३४ रनमा नटआउट रहे ।
१३३-७ को अवस्थामा रहेको हङकङका लागि यी दुईले १२८ रनको अविजित साझेदारी बनाए । नेपालका लागि कप्तान सन्दीप लामिछानेले ४ विकेट लिए भने शेर मल्लको भागमा ३ विकेट रह्यो ।
यस खेलमा नेपालसामु समूह विजेता बन्ने मौका छ । जारी प्रतियोगितामा तीन खेल खेलिसकेको नेपाल अपराजित छ । नेपाल ताजा स्थितिमा छ अङ्कसहित तालिकाको शीर्ष स्थानमा छ ।
नेपालले प्रतियोगिताको पहिलो खेलमा बहराइनविरुद्ध ७ विकेट, आयोजक मलेसियाविरुद्ध ६ विकेट तथा साउदी अरेबियाविरुद्ध ५ विकेटको जित निकालेको थियो । नेपाल आजको खेलमा पनि सहज जित दर्ता गर्ने योजनामा छ ।उता हङकङले भने तीन खेल खेल्दा दुई खेलमा जित र एक खेलमा हार व्यहोरेको छ ।
हालसम्म एकदिवसीय क्रिकेटमा हङकङविरुद्ध नेपालको भेट चारपटक मात्र भएको छ । जसमा नेपालले एक र हङकङले दुई खेल जितेको विगत छ । यी दुई टोलीबीचको एउटा खेल भने वर्षाका कारण रद्द भएको छ ।
नेपाल र हङकङले पछिल्लोपटक सन् २०१८ मा एकदिवसीय क्रिकेट खेलेका थिए । उक्त खेलमा नेपालले हङकङलाई ५ विकेटले हराएको थियो । नेपाली टोली आज आठ वर्षअघिको इतिहास दोहोर्याउने सोचमा छ ।
प्रतिक्रिया राख्नुहोस्