वैदेशिक रोजगारीमा जान चाहने युवाहरुलाई लक्षितत गरी ठगी धन्दा चलाउँदै आएका गिरोहले तालिम केन्द्र (ट्रेनिङ सेन्टर) नै संचालन गरेको तथ्य खुलेको छ ।
वैदेशिक रोजगारीका लागि पठाउने भन्दै मानिसबाट रकम ठगी गर्ने गिरोहले ट्रेनिङ सेन्टर सञ्चालन गरेको छ भन्ने सूचनाका आधारमा परिचालन भएको प्रहरीको टोलीले सो तथ्य फला पारेको हो ।
काठमाडौँ उपत्यका अपराध अनुसन्धान कार्यालयको प्रहरी टोलीले एउटा ट्रेनिङ सेन्टरमा छापा मारेर झण्डै एक हजार राहदानी बरामद गरेको छ ।
प्रवक्ता प्रहरी उपरीक्षक रवीन्द्र रेग्मीले विदेशमा आकर्षक रोजगारीका नाममा ठगी गरेको सूचनाका आधारमा महाराजगंजस्थित सी स्टार ट्रेनिङ सेन्टरमा खानतलासी गर्दा नौ सय ९७ राहदानी फेला परेको जानकारी दिनुभयो ।
उहाँले भन्नुभयो, “पीडितबाट रकम असुलेर फरार भएका गिरोहले उक्त सेन्टरमा झण्डै एक हजार राहदानी राखेको भेटियो । यस विषयमा थप अनुसन्धान जारी छ ।”
यसअघि पक्राउ परेका ललितपुर निवासी ४७ वर्षीय लालबहादुर लामासँगको बयानपछि प्रहरीले उक्त सेन्टरमा छापा मारेर नौ सय ९७ राहदानी फेला पारेको रेग्मीले बताउनुभयो । लामाले काठमाडौँ महाराजगञ्जमा उक्त ट्रेनिङ सेन्टर सञ्चालन गरेका थिए ।
पीडितलाई वैदेशिक रोजगारीका लागि लिथोनिया, क्यानडा, सिङ्गापुरलगायत मुलुकमा आकर्षक तलबको लोभ देखाएर पैसा असुल्ने गरेको अनुसन्धानका क्रममा पाइएको छ । सोही क्रममा लामाले मानिसबाट राहदानी सङ्कलन गरेको प्रहरीले जनाएको छ ।
अहिलेसम्म पीडितहरूबाट रु १० करोड रकम ठगी गरी लामा फरार भएका थिए । लामालाई काठमाडौँ महानगरपालिका–३१ शङ्खमूलबाट पक्राउ गरिएको रेग्मीले बताउनुभयो । उहाँका अनुसार निजलाई थप अनुसन्धान तथा कारबाहीका लागि वैदेशिक रोजगार विभाग ताहाचल काठमाडौँ पठाइएको छ ।
लामाले पीडितहरूबाट रु पाँच लाखदेखि १५ लाखसम्म लिनुका साथै कतिपयलाई वैदेशिक रोजगारमा पठाउन नसकेको पनि पाइएको छ ।
कतिपय व्यक्ति सिङ्गापुर पुगेपछि विमानस्थलबाटै नेपाल फर्काइएकोसमेत अनुसन्धानको क्रममा खुल्न आएको रेग्मीले बताउनुभयो । उहाँका अनुसार सेन्टरबाट पीडित भएकाहरुले दिएको उजुरीपछि उक्त घटना बाहिर आएको हो ।
प्रतिक्रिया राख्नुहोस्