नेपाली भूमिमा पुल निर्माण गर्दा एसएसबीको अबरोध
![Nepal-India Discuss](https://www.nepaljapan.com/wp-content/uploads/2021/01/Nepal-India-Discuss-1.jpg)
नेपाली भूमि डुुबानमा पार्ने गरी विना सहमति दशगजामा अन्तराष्ट्रिय कानुन विपरीत सडकको नाममा बाँध बनाउने भारतले नेपालले आफ्नै भूमिमा पुल बनाउन समेत रोक लगाएको छ । हुलाकी राजमार्ग अन्तर्गत सप्तरीमा पुल निर्माणमा भारतीय सीमा सुरक्षा बल (एसएसबी)ले अबरोध गरेको हो ।
जिल्लाको डाक्नेश्वरी नगरपालिका वडा नम्बर ६ कटैयामा खडक खोलाको पुल निर्माणमा एसएसबीले अवरोध पुर्याएको हो । समाचार अनुसार हुलाकी आयोजनाले ८ माघ २०७६ मा इलाइट कन्स्ट्रक्सन प्रालि काठमाडौंसँग यो पुल निर्माणका लागि सम्झौता गरेको थियो ।
सम्झौता भएपछि कन्स्ट्रक्सनले प्राविधिक कर्मचारी, कामदार र उपकरण ल्याएर काम शुरु गर्न खोज्दा एसएसबीले अवरोध पुर्याएका हुन् । १८ करोड ३३ लाख लागतमा निर्माण ठेक्का दिइएको सो पुल १ सय १२ मिटर लम्बाइ र ११ मिटर चौडाइको रहनेछ । पुल बनाउने भनेर पारी भारतीय गाउँ करियौर र नेपालतर्फका कटैयाका बासिन्दाका बीचमा छलफल हुँदा पुल बनाउने सहमति भएको थियो ।
तर, सीमा नजिकै पुल बनिरहेकाले भारतीय पक्षले दुबै देशको सहमतिमा बन्नुपर्ने अडान एसएसबीले लिएको छ । नेपाली भूमीमा नेपाली पक्षले बनाउन लागेको पुलमा अवरोध पुर्याउँदा काम ठप्प भएको छ । भारतीय गाउँ करियौर गाउँका बासिन्दाले पनि पुल निर्माण हुन लागेको जग्गा नेपालकै भएको बताइरहँदा पनि एसएसबीले काम गर्न नदिएको हो ।
प्रतिक्रिया राख्नुहोस्