काठमाडौं महानगरपालिकाले विदेशका शहर, व्यक्ति तथा संस्थाको नाम राखेर खुलेका निजी विद्यालयहरुलाई एक महिनाभित्र नेपालीपन झल्कने नाम फेर्न समय दिएको छ ।
शिक्षा नियावलीमा विद्यालयको नाम नेपालीपन झल्कने हुनुपर्ने भए पनि अहिले अधिकांश संस्थागत विद्यालयको नाम सो अनुसार नभएकाले एक महिनाभित्र फेर्न सूचना जारी भएको हो ।
महानगरपालिका विद्यालय शिक्षा व्यवस्थापन नियमावली, २०७४ को नियम ७० मा व्यवस्था भए बमोजिम नेपालीपन झल्कने गरी विद्यालयको नामाकरण गर्नुपर्ने छ ।
महानगरले बिहिबार जारी सार्वजनिक सूचनामा नेपालीपन झल्कने नाम नभएका विद्यालयहरूले नियमावलीमा व्यवस्था भए बमोजिम विद्यालयको नामाकरण गर्नको लागि प्रक्रिया अघि बढाइ एक महिनाभित्र विद्यालय व्यवस्थापन समितिको निर्णयसहित निवेदन पेश भनिएको छ ।
त्यसै गरी महानगरपालिकाले बिहीबार नै अर्को सूचना जारी गरेर सामुदायिक ‘विद्यालयको स्वामित्वमा रहेका भवन, कोठा, सटर, जग्गा वा अन्य भौतिक संरचना तेस्रो पक्षलाई भाडामा दिएको छ भने उक्त निर्णय र सम्झौताका कागजातका प्रमाणित प्रतिलिपिहरू उपलब्ध गराउन निर्देशन दिएको छ ।
प्रतिक्रिया राख्नुहोस्