बहुमतको सरकार दावी पेश नभएपछि सबैभन्दा ठूलो दलको हैसियतमा केपी ओली प्रधानमन्त्रीमा नियुक्त

कामचलाउ सरकारका प्रधानमन्त्री केपी शर्मा ओली पुनः प्रधानमन्त्रीमाा नियुक्त हुनुभएको छ । वैशाख २७ गते संसदमा विश्वासको मत लिन असफल भएपछि स्वतः पदमुक्त हुनुभएका ओलीलाई दलहरुले बहुमतको सरकारको दावी गर्न नसकेपछि अल्पमतको सरकारका प्रधानमन्त्रीमा नियुक्त गरिएको हो ।

प्रधानमन्त्री ओलीले २७ वैशाखमा संसदको विश्वास पाउन नसकेपछि राष्ट्रपतिले तीन दिनभित्र संविधानको धारा ७६ (२) अनुसार दुई वा दुईभन्दा बढी दलको समर्थनमा सरकार गठनका लागि आहृवान गर्नुभएको थियो ।

वैकल्पिक सरकार गठनको प्रयासमा जुटेका नेपाली कांग्रेस र माओवादी केन्द्र बहुमत जुटाउन असफल भएपछि राष्ट्रपति विद्यादेवी भण्डारीले संविधानको धारा ७६ (३) अनुसार संसदको सबभन्दा ठुलो दलको संसदीय दलको नेता ओलीलाई प्रधानमन्त्रीमा नियुक्त गर्नुभएको हो । प्रधानमन्त्रीको शपथग्रहण शुक्रबार हुनेछ ।

प्रधानमन्त्री ओलीले अब ३० दिनभित्र विश्वासको मत लिनुपर्छ, नभए धारा ७६ (५) अनुसार सरकार गठनको प्रयास हुनेछ । त्यो पनि असफल भए मुलुक मध्यावधि चुनावतिर जानेछ ।