नेपाली कांग्रेस संसदीय दलका नेता भीष्मराज आङ्देम्बेले पार्टीले प्रमुख प्रतिपक्षी दलको जिम्मेवारी सशक्त रूपमा बहन गर्ने बताउनुभएको छ ।
संसदीय दलको नेतामा निर्विरोध निर्वाचित भएपछि सोमबार दलको कार्यालय सिंहदरबारमा सञ्चारकर्मीसँग उहाँले सत्तामा रहेकालाई सही काम गर्न सशक्त भूमिका निर्वाह गरिने बताउनुभयो । संसदीय दलको नेताका हैसियतमा आफूले त्यो भूमिकालाई थप प्रभावकारी बनाउन लाग्ने नेता आङ्देम्बेको भनाइ थियो ।
“सरकारका राम्रा कामको समर्थन र नराम्रा कामको सशक्त प्रतिवाद गर्छौँ । सत्तामा रहनेले लोकतान्त्रिक संस्कार र प्रणालीमा घोचपेच गरेमा सचेत गराउँछौँ”, उहाँले भन्नुभयो ।
संसदीय दलका नेता आङ्देम्बेले दलको प्रमुख सचेतक र सचेतकलगायत बाँकी पदाधिकारी २४ घण्टाभित्र मनोनयन गर्नेगरी छलफल भइरहेको जानकारी दिनुभयो ।
नेता आङ्देम्बेको राजनीतिक जीवनी
एकसट्ठी वर्षीय आङ्देम्बे करिब पाँच दशकदेखि कांग्रेस राजनीतिमा सक्रिय हुनुहुन्छ । उहाँ पञ्चायतविरोधी आन्दोलन, पहिलो र दोस्रो जनआन्दोलनका अग्रपंक्तिका नेता हुनुहुन्छ ।
उहाँले विसं २०३६ मा पाँचथरको फिदिम माध्यमिक विद्यालयमा अध्ययन गर्दादेखि नेपाल विद्यार्थी सङ्घका माध्यमबाट राजनीतिमा प्रवेश गर्नुभएको हो । पाँचथरको साविक उम्लाबुङ घर भएका आङ्देम्बे आफ्ना बाजे पूर्वमन्त्री देउमान आङ्देम्बेको प्रेरणाले राजनीतिमा लाग्नुभएको हो ।
विसं २०४२ मा कांग्रेस नेताहरू सत्याग्रहमा बस्नुभएको थियो । त्यस क्रममा उहाँ पनि पक्राउ परेर नौ महिना जेल बस्नुभएको थियो । त्यसपछि पटकपटक गरी उहाँ डेढ वर्ष जेल बस्नुभयो ।
आङ्देम्बे विसं २०४२ तिरै नेविसङ्घको केन्द्रीय सदस्य हुनुभएको थियो । २०४६ सालको जनआन्दोलनमा उहाँले नेविसङ्घको केन्द्रीय सदस्यका रूपमा पूर्वाञ्चलको कमाण्ड सम्हाल्नुभएको थियो ।
विसं २०४६ मा प्रजातन्त्र पुनःस्थापना भएपछि उहाँ २०४९ को स्थानीय निकायको निर्वाचनमा आङ्देम्बेलाई जिल्ला विकास समितिको सभापति बनाउने चर्चा भएको थियो, तर उहाँले भने नेता भूविक्रम नेम्बाङ वरिष्ठ नेता भएकाले उहाँलाई छोडेको सुनाउनुभयो । त्यसबेला उहाँ जिल्ला विकास समितिको सदस्य हुनुभएको थियो ।
आङ्देम्बे विसं २०५१ मा नेपाल तरुण दलको केन्द्रीय उपाध्यक्ष बन्नुभयो । विसं २०५६ मा उहाँ पाँचथर जिल्ला निर्वाचन क्षेत्र–२ बाट संसदीय निर्वाचनमा उम्मेदवार बने पनि पराजित हुनुभयो । त्यसपछिका निर्वाचनमा पनि उम्मेदवार भएका आङ्देम्बे विसं २०७० मा भएको दोस्रो संविधानसभा निर्वाचनमा जित हासिल गर्नुभएको थियो ।
त्यसबेला उहाँ संविधानसभाको संसदीय सुनुवाई समिति सदस्य बन्नुभएको थियो । संविधान निर्माणमा क्रममा देखिएका विवाद समाधान गर्न गठित समितिमा रहेर पनि उहाँले काम गर्नुभयो ।
त्यसबेला उहाँ नेपाली समाजको बहुजातीय र बहुधार्मिक संरचनालाई स्वीकार गर्दै बहुपहिचानकै आधारमा समाधान खोज्नुपर्ने धारणा राख्दै एकल पहिचानका विपक्षमा उभिनुभएको थियो ।
राज्य पुनर्संरचनामा पहिचानलाई कसरी समेट्ने भन्ने विषयमा भीमबहादुर तामाङ, महेश आचार्य, डा मीनेन्द्र रिजाल र आङ्देम्बेलगायत नेताहरू सम्मिलित एउटा समिति गठन गरिएको थियो । उक्त समितिले व्यापक बहस र छलफलपछि ‘जातीय द्वन्द्व मेटिने, पहिचान भेटिने’ भन्ने मार्गचित्र प्रस्तुत गरेको थियो ।
“यो निष्कर्ष केवल सैद्धान्तिक धारणामात्र नभई जनस्तरको वास्तविक भावना र अनुभवमा आधारित थियो”, उहाँ भन्नुहुन्छ,“पछि देश नै त्यही बाटोमा गयो । केही असन्तुष्टि भए पनि धेरैजसो विरोधका स्वर तत्कालका लागि मत्थर हुन पुगेका थिए ।”
संविधानसभा व्यवस्थापिका संसद्मा रुपान्तरित भएपछि आङ्देम्बे संसद्को उद्योग, वाणिज्य, आपूर्ति तथा उपभोक्ता हित संरक्षण समिति सभापति भई काम गर्नुभएको थियो ।
कांग्रेसको आदिवासी जनजाति विभागको संयोजकका रूपमा काम गर्दै उहाँले पार्टीभित्र समावेशी मुद्दालाई उठाएर त्यसलाई सम्बोधन गर्न दबाब सिर्जना गर्नुभएको थियो ।
यस्तै, कांग्रेस केन्द्रीय अनुशासन समितिको संयोजक भएर आङ्देम्बे सङ्गठनभित्र अनुशासन कायम गर्ने जिम्मेवारी पनि सम्हाल्नुभयो । आङ्देम्बे तीनपटक केन्द्रीय सदस्य र एकपटक सहमहामन्त्री भइसक्नुभएको छ ।
प्रतिक्रिया राख्नुहोस्