राष्ट्रिय स्वतन्त्र पार्टी (रास्वपा) ले आफ्नो प्रथम राष्ट्रिय महाधिवेशनको तयारीलाई तीव्र बनाएको छ। जनताका मुद्दा, सुशासन र वैकल्पिक राजनीतिको एजेन्डा बोकेर स्थापना भएको रास्वपाले पहिलो निर्वाचनमै उल्लेखनीय जनसमर्थन प्राप्त गरेको थियो।
त्यसपछिको राजनीतिक उतारचढाव, सरकारको नेतृत्वमा पुगेपछि देखिएका चुनौती तथा पार्टीभित्रको आन्तरिक बहसका बीच हुन लागेको यो महाधिवेशनलाई रास्वपाको भावी दिशा तय गर्ने महत्वपूर्ण अवसरका रूपमा हेरिएको छ।
चितवनको भरतपुरमा हुने महाधिवेशन उद्घाटन समारोहलाई सम्बोधन गर्न पार्टी सभापति रवि लामिछाने र प्रधानमन्त्री तथा वरिष्ठ नेता बालेन्द्र शाह उपस्थित हुने कार्यक्रम तय गरिएको छ। उद्घाटन सत्रमा विभिन्न राजनीतिक दलका नेताहरूले समेत शुभकामना मन्तव्य दिने जनाइएको छ।
रास्वपा सरकारको नेतृत्वमा पुगेयता विपक्षी दलहरूले सरकारको कार्यशैली, निर्णय प्रक्रिया र नेतृत्व क्षमतामाथि विभिन्न आरोप लगाउँदै आएका छन्। यद्यपि पार्टी नेतृत्वले ती आरोपहरूलाई राजनीतिक पूर्वाग्रहका रूपमा व्याख्या गर्दै आएको छ।
अर्कोतर्फ, पार्टी सभापति रवि लामिछाने लामो समयदेखि सार्वजनिक रूपमा अपेक्षाकृत मौन देखिनुभएको छ, जसलाई लिएर राजनीतिक वृत्तमा विभिन्न टिप्पणीहरू भइरहेका छन्।
केही सञ्चारमाध्यम र राजनीतिक विश्लेषकहरूले रास्वपाभित्र गुटबन्दी तथा नेतृत्व व्यवस्थापनसम्बन्धी बहस चलिरहेको चर्चा गरिरहेका छन्। तर पार्टीका नेताहरूले भने यसलाई लोकतान्त्रिक दलभित्र स्वाभाविक रूपमा हुने विचार विमर्शको प्रक्रियाका रूपमा व्याख्या गर्दै आएका छन्।
यही पृष्ठभूमिमा हुन लागेको पहिलो महाधिवेशनले पार्टीभित्रको एकता, संगठनात्मक संरचना र भावी राजनीतिक रणनीतिबारे स्पष्ट सन्देश दिने अपेक्षा गरिएको छ।
महाधिवेशन उद्घाटनका लागि भरतपुरको गेस्ट हाउस चौरमा घामपानीबाट जोगाउने ‘जर्मन ह्याङ्गर’ निर्माण गरिएको छ। तीन खण्डमा विभाजित उक्त संरचनामा करिब पाँच हजार कुर्सी व्यवस्थापन गर्न सकिने र करिब १० हजार व्यक्तिसम्म अट्न सक्ने जनाइएको छ।
उद्घाटन समारोहलाई आकर्षक बनाउन चितवनको पहिचान झल्कने विभिन्न जातीय तथा सांस्कृतिक प्रस्तुति पनि समावेश गरिने तयारी गरिएको छ।
असार ७ गते दिउँसो २ बजे उद्घाटन सत्र सुरु हुने र ८ गते बिहानदेखि बन्दसत्र सञ्चालन गरिने कार्यक्रम छ। उद्घाटन समारोह गेस्ट हाउस चौरमा हुने भए पनि बन्दसत्र भने चितवन उद्योग संघको सभाहलमा सञ्चालन गरिनेछ।
महाधिवेशनमा एक सय पदाधिकारी तथा केन्द्रीय सदस्य प्रत्यक्ष निर्वाचनमार्फत चयन हुनेछन् भने अन्य सदस्यहरू विधानअनुसार मनोनयन गरिने व्यवस्था छ। मतदानका लागि पहिलोपटक विद्युतीय मतदान प्रणाली (ई–भोटिङ) प्रयोग गर्ने तयारी गरिएको छ।
महाधिवेशनमा करिब तीन हजार प्रतिनिधि र अन्य सहभागी गरी चार हजारभन्दा बढी व्यक्तिको उपस्थिति रहने अनुमान गरिएको छ। प्रतिनिधिहरूको बसोबासका लागि भरतपुर, नारायणगढ, सौराहा, टाँडी, मेघौली, पटिहानी तथा नजिकका क्षेत्रका होटलहरूमा व्यवस्थापन मिलाइएको छ। होटल खर्च प्रतिनिधिहरूले स्वयं व्यहोर्ने भए पनि खाना, खाजा तथा आवतजावतका लागि सटल बसको व्यवस्था पार्टीले गर्ने जनाएको छ।
रास्वपाले महाधिवेशनमा सहभागी हुन प्रतिनिधिबाट पाँच हजार रुपैयाँ शुल्क संकलन गर्ने व्यवस्था गरेको छ। पार्टीका अनुसार निर्धारित शुल्क तथा लेबी नबुझाएका प्रतिनिधिलाई महाधिवेशन प्रक्रियामा सहभागी नगराइनेछ।
राजनीतिक रूपमा संक्रमणकालीन मोडमा रहेको रास्वपाका लागि यो महाधिवेशन केवल नेतृत्व चयनको प्रक्रिया मात्र नभई पार्टीको संगठनात्मक एकता, वैचारिक स्पष्टता र भविष्यको राजनीतिक मार्गचित्र निर्धारण गर्ने महत्वपूर्ण अवसरका रूपमा हेरिएको छ।
विशेष गरी जनताले वैकल्पिक शक्तिप्रति व्यक्त गरेको विश्वासलाई संस्थागत रूप दिन र सरकार सञ्चालनसँग जोडिएका प्रश्नहरूको जवाफ खोज्न पनि यो महाधिवेशन निर्णायक बन्न सक्ने राजनीतिक विश्लेषकहरूको भनाइ छ।
प्रतिक्रिया राख्नुहोस्