राजनीति

स्वास्थ्यमा एउटै औजारमा करोडौँ कमिशन खाने प्रवृति

स्वास्थ्य तथा जनसङ्ख्यामन्त्री भानुभक्त ढकालले स्वास्थ्य क्षेत्रको बेथिति दुई महिनामै पहिचान गरिएको बताउँदै एउटै औजारमा करोडौँ कमिसन खाने कार्यले स्वाथ्य क्षेत्र नबन्ने बताउनुभएको छ । मन्त्री ढकालले बुधबार कञ्चनपुरको शुक्लाफाँटा नगरपालिका–४ असंैना स्वास्थ्य चौकीमा आयोजित कार्यक्रमलाई सम्बोधन गर्दै सो धारणा राख्नुभएको हो ।

पिपलाडी स्वास्थ्यचौकीलाई स्तरोन्नति गरी अस्पताल बनाउने घोषणा भइसकेको बताउँदै उहाँले सरकारबाट औजार, भवन, चिकित्सक, औषधिलगायत के कुरा चाहिएको हो, ठोस प्रस्ताव लिएर आउनु होस्, त्यो पूरा गर्न आफू तयार रहेको भन्नुभयो ।

कानून, न्याय तथा संसदीय मामिलामन्त्रीसमेत रहनुभएका स्वास्थ्य तथा जनसङ्ख्यामन्त्री ढकालले नयाँ संविधान बनेपछिको निर्वाचित सरकारले २४२ वटा नयाँ कानून बनाएको बताउँदै महिलाका लागि अंश वंशको कानून बनाइएको र त्यसलाई व्यवस्थित गरिने, दलित समुदायका लागि जग्गा दिने कुरा कानूनमै उल्लेख गरिएकाले जग्गाको मालिक बनाएर नै छाड्ने दृढता व्यक्त गर्नुभयो । अपराधी पत्ता नलाग्दासम्म क्षतिपूर्ति पाउनेसम्मको कानून निर्माण गरिएको पनि उहाँले बताउनुभयो ।

सुकुम्वासी समस्या समाधानका लागि भूमिसम्बन्धी कानून बनेको छ उहाँले भन्नुभयो, “जुन ठाउँमा वर्षौंदेखि बस्नुभएको छ । नडराइकन बस्नोस् । अधिकार सम्पन्न आयोग बनाएर जनताका हातमा जग्गाधनी पूर्जा उपलब्ध गराउँछौँ ।”

प्रतिनिधिसभाका सांसद नरबहादुर धामीले पिपलाडी स्वास्थ्यचौकीको स्तरोन्नति गरी अस्पताल बनाउनका लागि तराई मधेश समृद्धि कार्यक्रमअन्तर्गत चालु आवमा रु २५ लाख बजेट विनियोजन भइसकेकाले सो कार्य अगाडि बढ्ने विश्वास व्यक्त गर्नुभयो ।

सम्बन्धित खबर

Back to top button