सरकारले सामाजिक सञ्जाललाई नियमन तथा व्यवस्थित गर्न भन्दै जारी गरेको अध्यादेश अनुसार मेता कम्पनी दर्ता हुन नआए प्रतिबन्ध लगाउने बताएको छ ।
बुधबार सञ्चार तथा सूचना प्रविधिमन्त्री पृथ्वीसुब्बा गुरुङले नेपाल टेलिकमको २१ औं वार्षिकोत्सवमा बोल्दै नेपालमा दर्ता नभएका कुनै पनि सामाजिक सञ्जाल चल्न नदिने चेतावनी दिनुभएको हो ।
मन्त्री गुरुङले भन्नुभयो, “हामीसँग अहिले दर्ता भएर, प्वाइन्ट अफ कन्टयाक्ट तोकेर बसेको सम्मटिकटक मात्रै छ । हामीले मेटालाई बोलाइरहेका छौँ, आउँछ कि आउँदैन हेर्न बाँकी छ । आएन भने नेपालमा चल्न दिन्नौं ।”
कार्यक्रममा उहाँले सामाजिक सञ्जाल अराजक बन्दै गएको र त्यसलाई नियमन गर्नुपर्ने आम नागरिकहरुकै मागका कारण सामाजिक सञ्जाल सम्बन्धी विधेयक ल्याइएको दावी गर्नुभयो ।
त्यस क्रममा मन्त्री गुरुङले भन्नुभयो, ‘हाम्रो सामाजिक सद्भाव जसले भत्काउँछ, त्यसलाई हामीले राखेकै छौँ । हाम्रो धार्मिक सहिष्णुता भत्काउनेलाई राखेका छौँ । त्यसलाई हामी रोक्न चाहन्छौँ, त्यसलाई हामी नियमन गर्न चाहन्छौँ । त्यसैले हामीलाई यो विधेयक चाहिएको हो ।’
मनपरी लेख्ने, मनपरी गर्ने कुरा लोकतन्त्र नभएको र त्यसकै नियमनका लागि संसद्मा सामाजिक सञ्जाल सञ्चालन र नियमन गर्ने विधेयक पेश गरिएको पनि बताउनुभयो ।
मन्त्री गुरुङले भन्नुभयो, ‘धेरैको माग सोसल मिडियालाई रेगुलेट गर्दिनुपर्यो भन्ने छ । यो मनपरी गर्ने, मनपरी भन्ने कुरा लोकतन्त्र होइन होला नि त । त्यसैले हामीले सोसल मिडिया प्रयोग, सञ्चालन र नियमन गर्ने विधेयक पेश गरेका छौँ । विरोध अलिअलि सुरू भएको छ । लोकतन्त्रमा विरोध त भइहाल्छ ।’
मन्त्री गुरुङले सामाजिक सद्भाव भत्काउने, विद्वेष फैल्याउने, धार्मिक सहिष्णुता भत्काउने कुरा देशद्रोह भएकाले सामाजिक सञ्जालमा त्यस्तो गर्नेलाई दण्ड सजायको प्रावधान राखिएको पनि बताउनुभयो ।
कार्यक्रममा उहाँले देशको बारेमा मनपरी भन्न पाउने कुरा नै लोकतन्त्र हो भनेर कसैले भने त्यो स्वीकार्य नहुने बताउँदै जनताको सूसुचित हुने अधिकार खोसिनु हुँदैन भन्नेमा सरकार सचेत रहेको पनि बताउनुभयो ।
प्रतिक्रिया राख्नुहोस्