सोमबार विहान ललितपुरको सानेपामा रहेको आफ्नै निवासमा पूर्वसचिव अर्जुन कार्कीकी पत्नी मुना कार्कीको हत्या उहाँकै घरमा काम गर्ने विजय चौधरीले गरेको प्रहरीले निष्कर्ष निकालेको छ । भान्छा छेऊ रहेको सीसी क्यामराको दृश्य हेरेपछि चौधरीले नै हत्या गरेको निष्कर्षमा प्रहरीहरु पुगेका छन् ।
हत्यापछि अनुसन्धानमा जुटेको प्रहरीले सीसीटीभीको फुटेज हेरेर कार्कीको घरमा कार्यरत कामदार २२ वर्षीय विजय चौधरीले मुनाको हत्यापछि झुण्डिएर आत्महत्या गरेको निष्कर्ष निकालेको हो ।
ललितपुर प्रहरी परिसर जावलाखेलका एक अनुसन्धान अधिकृतका अनुसार भान्सामा रहेको पिर्का प्रहार गरेर कामदारले हत्या गरेको हुनसक्ने आशंका प्रारम्भमै गरिएको थियो । फुटेजमा चौधरीले महिलालाई घाँटीमा समातेर घिसार्दै लगेको देखिन्छ । सो दृश्य बिहान ९ बजेको हो । प्रहरीका अर्का उच्च अधिकृतले पनि फुटेजमा चौधरीले मुनालाई आक्रमण गरेको देखिएको पुष्टि गरेका छन् ।
यद्यपि, दुईबीच के रिसिइबी थियो भन्ने खुलिसकेको छैन । प्रहरीले हत्याको कारण खोज्दै विभिन्न व्यक्तिसँग वयान लिने क्रम जारी राखेको छ ।छिमेकीका अनुसार चौधरीलाई कार्की परिवारले सानैदेखि घरमा राखेको थियो ।
प्रहरीका अनुसार घटना हुँदा पूर्वसचिव कार्की बिहानैउठेर पशुपतिनाथको दर्शन गर्न जानुभएको थियो । फर्किएर आउँदा उनले श्रीमती मुनालाई अचेत अवस्थामा फेला पारेर प्रहरीलाई खबर गरे लगत्तै उद्धार गरेर स्टार हस्पिटल पुर्याइए पनि चिकित्सकले मृत घोषित गरेको थियो ।
प्रतिक्रिया राख्नुहोस्