फागुन २१ गते सम्पन्न प्रतिनिधिसभा निर्वाचनमा पराजित जनमत पार्टीका अध्यक्ष डा. सीके राउतले अब संसदीय राजनीतिबाट अवकाश लिंदै अधिकारका लागि संघर्ष गर्ने घोषणा गर्नुभएको छ ।
मधेशको वैकल्पिक राजनीतिक दलका रुपमा २०७९ सालको आम निर्वाचनमा उदाएको सिके नेतृत्वको जनमतले यसपटक एक स्थानमा पनि जित हात पार्न सकेन । यसै विषयमा सोमबार प्राइम टीभीको कार्यक्रम ‘जनता जान्न चाहन्छन्’संगको कुराकानीमा उहाँले सो घोषणा गर्नुभएको हो ।
अन्तर्वार्ताका क्रममा राउतले भन्नुभयो, “यसपालिको निर्वाचनमा जिते पनि हारे पनि संसदीय राजनीतिबाट अवकाश लिन्छु भन्ने सोचेको थिएँ । यसको अर्थ पार्टीलाई अलपत्र पार्छु भन्ने होइन । आगामी निर्वाचनहरुमा पार्टीबाट तयारी गरे पनि म भने संसदीय चुनाव लड्दिनँ ।”
२०७९ को निर्वाचनमा पनि आफूमा उम्मेदवार बन्ने चाहना नरहेको भए पनि साथीहरुको जोडबलमा चुनाव लडेको बताउँदै राउतले नचाहँदा नचाहँदै लडेको र संसद्मा आफ्नो ठूलो उपयोगिता नरहेको पनि बताउनुभयो ।
प्रतिक्रिया राख्नुहोस्