खेल

गोलकिपर किरण एसियाको साताका उत्कृष्ट खेलाडी घोषित

किरण चेम्जोङ

किरण चेम्जोङ

नेपाली राष्ट्रिय फुटबल टिमका कप्तान तथा गोलकिपर किरण चेम्जोङ एसियाली फुटबल महासंघ (एएफसी)को छनोटमा एसियाकै शीर्ष खेलाडी बनेका छन् । साताको उत्कृष्ट खेलाडीको सूचीमा परेर विजेता हुने किरण पहिलो नेपाली हुन् ।



एएफसीले किरणसहित एसियाका शीर्ष १० खेलाडीको सूची सार्वजनिक गर्दै भोटिङका लागि आह्वान गरेकोमा किरणले सर्वाधिक भोट पाएर शीर्षस्थानमा रहेका हुन् ।

गत बिहिबार एएफसीले नाम सार्वजनिक गर्दै अप्रिल ४ सम्मका लागि भोटिङ गर्ने समय तोकिएकोमा किरणले सर्वाधिक ५५.६९ प्रतिशत भोट पाएर शीर्षस्थानमा रहेका हुन् । किरणपछि २०.७२ भोट पाउँदै साउदी अरेबियाका सालेह अल सेहरी दोस्रो स्थानमा रहे । त्यसै गरी इराकका अला अली मवाईले १०.१६ प्रतिशत भोट पाउँदै तेस्रो स्थानमा रहे ।

सूचीमा किरण, सालेह र अलासहित यूएईका अली माबखोत, कतारका मोहम्मद मुन्तरी, जापानका युया ओसाका, इरानका सरदार अजमोन, बहराइनका मोहमद मरहुन, जोर्डनका मुसा अल तामरी र ताजिकिस्तानका नका अलिसेर जालिलोभ परेका थिए ।

एएफसीले गत साता अन्तर्राष्ट्रिय फुटबलमा गरेको प्रदर्शनको आधारमा १० खेलाडीको मनोनयन सार्वजनिक गरेको थियो । जसको विजेता वेबसाइटमार्फत आउने भोटको आधारमा तय गरिने एएफसीको भनाइ थियो ।

किरणको कप्तानीमा नेपालले पहिलो उपाधि जित्ने क्रममा गत साता थ्री नेसन्स कपको उपाधि जितेको थियो । दशरथ रंगशालामा भएको फाइनलमा नेपालले बंगलादेशलाई २-१ गोलले पराजित गरेको थियो ।

नेपाललाई उपाधि दिलाएको दुई दिनअघि किरण भारतको आई लिग सिजन २०२१ को उत्कृष्ट गोलकिपर चुनिएका थिए । उनी पञ्जाव एफसीमा आबद्ध थिए । सिजनको १५ खेल मध्ये १४ खेल खेलेका किरणले ७ खेलमा क्लिनसिट राखेका थिए । जुन सिजनकै सर्वाधिक क्लिनसिट हो । सिजनमा उनले तीन पटक प्लेयर अफ दि म्याचको पुरस्कार प्राप्त गरेका थिए ।

किरण विदेशी लिगमा उत्कृष्ट भएको यो पहिलो पटक भने होइन । यसअघि सन् २०१८ मा किरण माल्दिभ्सको लिगमा उत्कृष्ट गोलकिपर घोषित भएका थिए । किरणले सो सिजनमा टिसी स्पोर्ट्सलाई माल्दिभ्सको लिगको उपाधि जिताउन उत्कृष्ट प्रदर्शन गरेका थिए । उनी माल्दिभ्सको लिग जित्ने पहिलो नेपाली खेलाडी पनि हुन् ।

सम्बन्धित खबर

Back to top button