कोरोना भाइरसको संक्रमणका बेला राज्यको जिम्मवार पदमा रहेका कूटनीतिक नियोगको गाडी चडेर कालोबजारी गर्ने व्यवसायी सुलभ अग्रवालको अवैतनिक दूत पद खारेज भएको छ । सरकारले अग्रवाललाई नेपालका लागि किर्गिज गणतन्त्रका मानार्थ अवैतनिक वाणिज्यदूत तोकेको थियो ।
तर कोरोना संक्रमणका बेला यसको रोकथाम तथा उपचारमा प्रयोग हुने स्वास्थ्य उपकरणा आफैं गाडीमा गएर बढी मूल्यमा बेच्दै गरेको अवस्थामा अग्रवाल पक्राउ परेका थिए । अग्रवालले अन्दाजी ३५ सय रुपैयाँ पर्ने थर्मल गनको मूल्य बढाएर १५ हजार रुपैयाँ प्रतिगोटा बेचेको आरोपमा प्रहरीले पक्राउ गरेको थियो ।
परराष्ट्र मन्त्रालयका प्रोटोकल महाशाखाले अग्रवालको पद खारेज गरिएको जानकारी किर्गिस्तानको सरकारलाई गरिएको जनाएको छ । चीफ अफ प्रोटोकल गेहेन्द्र राजभण्डारीले अग्रवालको पद खारेज गरिएको र यस बारेको जानकारी सम्बन्धित मुलुकलाई कूटनीतिक माध्यमबाट गराइएको बताउनुभएको छ ।
शङ्कर ग्रुपका सञ्चालक रहेका अग्रवाललाई उनले प्रयोग गर्ने २०९ एचसीसी नम्बरको कूटनीतिक नियोगको नम्बर प्लेट राखिएको पजेरो गाडी र त्यसको डिकीमा राखिएको ६७ थान थर्मल गनसहित पक्राउ गरिएको प्रहरीले बताएको थियो ।
अग्रवालको कालो धन्दापछि बुधवार साँझ एक विज्ञप्ति जारी गर्दै परराष्ट्र मन्त्रालयले नेपालमा रहेका सबै अवैतनिक वाणिज्य दूतहरूलाई उपलब्ध गराइएका केही विशेष सुविधा खोसिएको जनाएको थियो ।
उनीहरूलाई दिइएको नीलो नम्बर प्लेट र सवारी साधनमा राष्ट्रिय झण्डा प्रयोग गर्न दिने विगतको निर्णय अर्को सूचना नभएसम्मका लागि स्थगित गरिएको परराष्ट्र मन्त्रालयले बताएको थियो ।
प्रतिक्रिया राख्नुहोस्