कोरोना को ज्वरो नाप्ने उपकरण कालोबजारी गर्दागर्दै रंगेहात पक्राउ परेका सुलभ अग्रवाललाई छुटाउन झण्डावाल गाडीसहित हिरासत पुगेको आरोप लागेका उद्योग, वाणिज्य तथा आपूर्ति राज्यमन्त्री मोतीलाल दुगडले अग्रवाललाई छुटाउन आफूले भूमिका खेलेको भनी विभिन्न सञ्चारमाध्यममा आएको समाचारको खण्डन गर्नुभएको छ ।
उहाँले विज्ञप्तिमार्फत हाल कोभिड–१९ जस्तो महामारीले विश्व आक्रान्त परेका अवस्थामा आपूर्ति राज्यमन्त्रीको जिम्मेवारीमा रहेको आफ्नो प्रमुख दायित्व आपूर्ति व्यवस्थालाई सहज बनाउने हो भन्ने प्रष्ट गर्दै उहाँले जुनसुकै अवस्था पहुँचमा भएको व्यक्ति वा निकाय भए पनि यदि कसैले यस्तो मानवीय संकटका समयमा कुनै प्रकारको गैरकानूनी काम कारवाही गरेमा त्यसलाई कानूनबमोजिम कडाभन्दा कडा कारबाही हुनुपर्छ भन्ने आफ्नो मान्यता रहेको बताउनुभएको छ ।
केही सञ्चारमाध्यममा आएजस्तो निज अग्रवाललाई कानूनी कारवाहीबाट जोगाउन आफूले कुनै भूमिका निर्वाह नगरेको प्रेस स्पष्ट पार्दै उहाँले भन्नुभएको छ “सुलभ अग्रवालको सन्दर्भमा पनि पक्राउपश्चात् के भएको हो, त्यसबारे सत्यतथ्य बुझ्ने प्रयास गरेको हुँ, जुन मेरो पदीय जिम्मेवारी पनि हो तर निजलाई छुटाउने उद्देश्यले मैले कसैलाई भेटघाट, भनसुन र दबाब नदिएको कुरा प्रष्ट पार्दै ती समाचारहरुको खण्डन गर्न चाहन्छु ।”
यस्तो विषम परिस्थितिमा कालोबजारी गर्नेलाई कानूनबमोजिम कडाभन्दा कडा कारबाही गर्नुपर्छ भन्ने आफ्नो पहिलेदेखिकै धारणा रहेको बताउँदै राज्यमन्त्री दुगडले विश्वव्यापी महामारीको विषम परिस्थितिमा खटिइरहेको जिम्मेवार व्यक्तिमाथि कुनै तथ्यविना भ्रामक समाचार सम्प्रेषण गरेर अवाञ्छित लाञ्छना लगाउने कार्य नगरी जिम्मेवार सञ्चारकर्मीको भूमिका निर्वाह गर्नसमेत उहाँले सबै पत्रकारलाई अनुरोध गर्नुभएको छ ।
