प्रधानमन्त्रीले सबैसंग मत माग्नु भो म भन्छु- उहाँले बाहेक अरु कसैले मत नदिऔं

नेकपा माओवादी केन्द्रका अध्यक्ष पुष्पकमल दाहाल प्रचण्डले प्रधानमन्त्री केपी शर्मा ओलीको पक्षमा कसैले पनि मतदान गर्न नहुने बताउनुभएको छ । सोमबार प्रधानमन्त्रीले विश्वासको मत लिन आव्हान गरिएको प्रतिनिधिसभाको विशेष बैठकमा सम्बोधन गर्दै उहाँले प्रधानमन्त्रीको बाहेक अरु कसैको मत पनि पक्षमा नपरोस् भन्नुभयो ।

प्रधानमन्त्री केपी ओलीमाथि आरोपैआरोप लगाउनुभएका अध्यक्ष प्रचण्डले विश्वासको मत लिने काम पनि मुलुकलाई पुनः मध्यावधिमा लैजाने षड्यन्त्र त हैन भन्दै आफैंले मारेको संसद ब्यूतिएपछि त्यही संसदसंग विश्वासको मत माग्न लाज लाग्नुपर्ने बताउनुभयो ।

उहाँले नीति तथा कार्यक्रम र बजेटका लागि नियमित अधिवेशन बोलाउनुपर्ने बेला विश्वासको मत लिन विशेष अधिवेशन बोलाउनु पनि सन्देहात्मक भएको बताउँदै भन्नुभयो- “आज यदि तपाईले विश्वासको मत प्राप्त हुँदैन । त्यसपछि संविधानको अर्को धारामा जान्छु र सदनलाई फेरि विघटन गर्न र मध्यावधिमा जान आउनु भएको त होइन ?”

यदि विश्वासको मत लिन चाहेको भए सर्वोच्चले एमाले र माओवादी अलग अलग हुने फैसला गरेपछि नै प्रधानमन्त्री संसदमा आउनुपर्ने उनले बताए । संविधानको धारा ७६ (१) बाट (२) को प्रधानमन्त्री भएपछि प्रधानमन्त्री ओलीले त्यतिबेलै विश्वासको मत लिनुको साटो समर्थन किन फिर्ता नलिएको भनेर प्रश्न गरिरहेको प्रचण्डले बताउनुभयो ।