गनगन गरेर नबसौं नेतागण हो, सुझबुझ पुर्याऔं

राष्ट्रपति विद्यादेवी भण्डारीले बिहिबार साँझ २१ घण्टाभित्र नयाँ सरकार गठनको आधार प्रस्तुत गर्न सांसदहरुलाई आव्हान गरेपछि मुलुकको राजनीतिमा नयाँ तरंग उत्पन्न भएको छ । मन्त्रिपरिषद्को सिफारिशमा राष्ट्रपतिबाट भएको सो आव्हान असंवैधानिक भएको भन्दै कडा टिप्पणी भैरहेको छ भने दल र सांसदहरुलाई नयाँ चुनौति पनि ।

यसबीचमा नेपाली कांग्रेसका नेता गगन थापाले राष्ट्रपतिबाट आव्हान भएको समयभित्रै नयाँ सरकार गठन गरेर प्रधानमन्त्री केपी शर्मा ओलीलाई विदा गर्न र एकपछि अर्को असंवैधानिक कदमलाई साथ दिने राष्ट्रपति भण्डारीलाई महाभियोग लगाउन सुझाव दिनुभएको छ ।

सामाजिक सन्जालमा नेता थापाले लेख्नुभएको छ- “विश्वासको मत लिन मन नलागे प्रम (प्रधानमन्त्री)ले राजीनामा गर्ने अनि राष्ट्रपतिले प्रकृया शुरु गर्ने हो नेतागण, के राष्ट्रपति र प्रमले थाहा नपाएर यो गरेको हो ? जानेर गरेको हो । गनगन गरेर नबसौं । सुझबुझ पुर्याउँ र यिनले दिएको समय अगावै नयाँ सरकार बनाएर ओलीलाई बिदा गरौं, महाअभियोग लगाएर राप (राष्ट्रपति)लाई बिदा गरौं ।”

प्रधानमन्त्री पदमुक्त नहुँदै राष्ट्रपति भण्डारीले नयाँ सरकार गठनका लागि शुक्रबार साँझ ५ बजेसम्म संविधानको धारा ७६(५) अनुसार प्रधानमन्त्री नियुक्ति प्रयोजनका लागि आधार प्रस्तुत गर्न प्रतिनिधिसभाका सदस्यलाई आह्वान गनुभएको हो ।

संविधानको धारा ७६ को उपधारा ३ बमोजिम प्रधानमन्त्री नियुक्त भएका ओलीले विश्वासको मत लिने प्रक्रिया सुरु नगरी वा राजीनामा नदिई संविधानको धारा ७६ (५) बमोजिम नयाँ सरकार गठनको प्रक्रिया सुरु गर्नु असंवैधानिक कदम मानिएको छ ।