मुलुकको शासकीय प्रणाली सुदृढीकरण, दिगो आर्थिक विकास तथा प्रमाणमा आधारित नीति निर्माणलाई सहयोग पुर्याउने उद्देश्यले गैरआवासीय नेपाली संघ (एनआरएनए), पूर्व प्रशासक, निजी क्षेत्रका विज्ञ तथा विभिन्न सरोकारवालाबीच विशेष मस्तिष्क मन्थन कार्यक्रम सम्पन्न भएको छ।
बालुवाटारस्थित एनआरएनए सचिवालयमा आयोजित कार्यक्रममा मुलुकमा देखिएका नीतिगत अन्तर पहिचान गर्दै दीर्घकालीन नीति सुधारका सम्भावनाबारे विस्तृत छलफल गरिएको थियो।
कार्यक्रममा बहुविषयगत तथा समसामयिक विषयमा अध्ययन, अनुसन्धान र नीति पैरवीका लागि अनुभवी, दक्ष तथा प्राज्ञिक क्षमता भएका विज्ञहरूको प्रभावकारी उपयोग गर्न सक्षम संयन्त्र आवश्यक रहेको निष्कर्ष निकालिएको हो।
छलफलमा गैरआवासीय नेपाली, प्राज्ञिक विद्वान, सेवानिवृत्त राष्ट्रसेवक, उद्यमी–व्यवसायी, पत्रकार, कानुन व्यवसायी तथा अनुसन्धानकर्ताबीच सहकार्य विस्तार गर्दै नीति निर्माणमा संस्थागत योगदान बढाउनुपर्ने धारणा राखिएको थियो।
कार्यक्रममा नेपालको दीर्घकालीन तथा समावेशी आर्थिक विकासका लागि संरचनागत रूपान्तरणमा केन्द्रित आर्थिक नीति तर्जुमा र कार्यान्वयनमा जोड दिइएको थियो।
उत्पादन र उत्पादकत्व वृद्धि, औद्योगिकीकरण, डिजिटल तथा हरित अर्थतन्त्र, रोजगारी सिर्जना तथा सार्वजनिक–निजी–सहकारी साझेदारीलाई सुदृढ बनाउने नीतिमा विशेष ध्यान दिनुपर्ने सहभागीहरूको भनाइ थियो।
“एक पटकको नेपाली, सधैंको नेपाली” भन्ने अवधारणालाई आत्मसात गर्दै विश्वभर रहेका गैरआवासीय नेपालीहरूको ज्ञान, सीप र पुँजीलाई नेपालको समृद्धि र विकासमा प्रभावकारी रूपमा परिचालन गर्न आवश्यक कानुनी तथा नीतिगत ढाँचा निर्माणमा सहकार्य गर्ने विषयमा पनि छलफल भएको थियो।
संविधानले व्यवस्था गरेअनुसार गैरआवासीय नेपालीहरूको आर्थिक, सामाजिक तथा सांस्कृतिक अधिकार सुनिश्चित गर्न आवश्यक कानुनी प्रबन्धबारे समेत सहभागीहरूले धारणा राखेका थिए।
कार्यक्रममा नेपाली विज्ञहरूको अन्तर्राष्ट्रिय अनुभव र ज्ञानलाई नीति निर्माण तथा विकास प्रक्रियामा संस्थागत रूपमा उपयोग गर्नुपर्नेमा जोड दिइएको थियो।
निजी क्षेत्र, शैक्षिक संस्था तथा विदेशस्थित नेपाली विशेषज्ञबीच समन्वय गर्दै नीति संवाद, अनुसन्धान तथा रणनीतिक सुझाव तयार गर्ने साझा प्लेटफर्म निर्माण गर्नुपर्ने निष्कर्ष निकालिएको थियो।
छलफलका क्रममा कानुन, संविधान तथा सुशासन, अर्थतन्त्र, व्यापार तथा लगानी, जलवायु परिवर्तन तथा दिगो विकास, स्वास्थ्य, शिक्षा, विज्ञान–प्रविधि, कृषि, ऊर्जा, श्रम तथा वैदेशिक रोजगार, पर्यटन, पूर्वाधार विकास, विपद् व्यवस्थापन, मानव संसाधन विकास तथा डायस्पोराका नेपाली विज्ञहरूको ज्ञान र अनुभव उपयोगलगायत १५ वटा विषयगत क्षेत्रलाई प्राथमिकतामा राखेर काम अघि बढाउन सुझाव दिइएको थियो।
कार्यक्रममा एनआरएनएका अध्यक्ष डा. हेमराज शर्मा, निवर्तमान अध्यक्ष डा. बद्री केसी, महासचिव डा. चिरञ्जीवी खड्का, उपमहासचिव दिनेश कुमार घिमिरे तथा कोषाध्यक्ष कृष्ण तिमल्सिनालगायतले धारणा राख्नुभएको थियो। अन्य पदाधिकारी तथा सरोकारवालाहरू पनि अनलाइनमार्फत कार्यक्रममा सहभागी भएका थिए।
त्यसैगरी, कार्यक्रममा पूर्व मुख्यसचिवहरू एकनारायण अर्याल र शंकर बैरागी, पूर्व सचिवहरू शिशिरकुमार ढुङ्गाना, प्रेम कँडेल, रामप्रसाद घिमिरे, धनराज ज्ञवाली, फणिन्द्र गौतम र मणिलाम गेलालको उपस्थिति रहेको थियो।
यसैगरी सशस्त्र प्रहरीका अवकाशप्राप्त महानिरीक्षक राजु अर्याल, नेपाल उद्योग वाणिज्य महासंघका अध्यक्ष अञ्जन श्रेष्ठ, नेपाल उद्योग परिसंघका अध्यक्ष वीरेन्द्रराज पाण्डे, नेपाल उद्योग वाणिज्य संघका उपाध्यक्ष दीपक श्रेष्ठ, नेपाल पर्यटन बोर्डका पूर्व प्रमुख कार्यकारी अधिकृत दीपकराज जोशीको सहभागिता रहेको थियो।
यसे गरी नेपाल दूरसञ्चार प्राधिकरणका पूर्व वरिष्ठ निर्देशक आनन्दराज खनाल, जडीबुटी उत्पादन तथा प्रशोधन कम्पनीकी पूर्व महाप्रबन्धक सङ्गीता यादव, बिजनेस डेभलपमेन्ट एशोसिएट्स (बीडीए) का कार्यकारी अधिकृत इन्जिनियर सुदीप पौडेल, स्वतन्त्र ऊर्जा उत्पादकहरूको संस्था नेपाल (इप्पान) का अध्यक्ष गणेश कार्की तथा सल्लाहकार पूर्णलाल श्रेष्ठको पनि सहभागिता रहेको थियो।
प्रतिक्रिया राख्नुहोस्