बीचमा समस्या भयो अब लगातार खोप आउँछ

प्रधानमन्त्री केपी शर्मा ओलीले अब नेपालमा कोरोना भाइरस विरुद्धको खोप ल्याउन बीचमा केही समस्या भए पनि त्यो समस्या हटेको र अब खोप लगाउने अभियान नै चल्ने बताउनुभएको छ ।

शनिबार काठमाडौंमा आयोजित कार्यक्रममा प्रधानमन्त्री ओलीले केही समय खोप पाउन समस्या भए पनि मित्रराष्ट्रहरुसँगको संवादका कारण खोपमा देखिएको समस्या समाधान भएको बताउनुभएको हो ।

सरकारले पछिल्लो समय चीनबाट ४० लाख मात्रा भेरोसेल खोप ल्याउने सम्झौता गरिसकेको छ । सम्झौताको विवरण सार्वजनिक नभए पनि यसअघिको तयारी पहिलो चरणमा त्यति मात्राको भएकाले सो अन्दाज गरिएको छ ।

कार्यक्रममा प्रधानमन्त्री ओलीले कोरोना भाइरसबाट जोगिन विगतमा मास्क लगाउने, सामाजिक दूरी कायम गर्ने र हात धुने जस्ता उपाय रहेकामा अब खोप मार्फत कोरोना सर्न नपाउने स्थितिमा पुर्याउने बताउँदै उनले पहिले जोखिमयुक्त समूहलाई खोप दिने र त्यसपछि क्रमश सबै नागरिकलाई खोप दिने योजना पनि सुनाउनुभयो ।

त्यसै गरी उहाँले सरकारको प्रयासका कारण नेपालमा कोरोना महामारीको क्षति कम भएको दावी गर्दै खोप आउन थालेपछि थप सुरक्षित हुने बताउनुभयो ।