राजनीति

विषम परिस्थितिको ख्याल गर्दै सतर्कता अपनाउन सभामुखको सुझाव

सभामुख अग्निप्रसाद सापकोटाले विषम परिस्थितिको ख्याल गर्दै घरमै बसेर बकर इद मनाउनुु हुन र स्वास्थ्य सतर्कता अपनाउन सबै मुस्लिम समुदायलाई आग्रह गर्नुभएको छ । इस्लाम धर्म मान्ने मुस्लिम समुदायको महत्वपूर्ण चाड बकर इदका अवसरमा शुभकामना सन्देश दिनुहुँदै उहाँले धार्मिक, सांस्कृतिक तथा सामाजिक विविधताबीचको एकताका लागि नेपाल विश्वसामु उदाहरणीय रहेको बताउनुभएको छ ।

बकर इद नमाज पढेर एकअर्कालाई शुुभकामना दिएर मनाइने उल्लेख गर्दै सभामुखले संयमता, आपसी सद्भाव, धैर्य, शान्ति र भाइचाराको सन्देश दिने यो पर्व सामूहिक एकता र भ्रातृत्वको पर्वसमेत भएको उल्लेख गर्नुभएको छ ।

यो वर्ष कोरोना भाइरसका कारण पहिलेजस्तो सहज ढङ्गले पर्व मनाउने अवस्था नभएको तथ्य पेश गर्दै सभामुख सापकोटाले बकर इदजस्ता पर्वले हामीबीच मजबुत एकता, दिगो शान्ति र आपसी सद्भाव बढाउन मद्दत मिल्ने विश्वास व्यक्त गर्नुभएको छ ।

उहाँले विषमताका बाबजुद यस पर्वमार्फत राष्ट्रिय एकता र धार्मिक तथा सांस्कृतिक सद्भाव कायम राख्न सबैमा प्रेरणा मिल्ने कामनासमेत गर्नुभएको छ ।

यसै गरी राष्ट्रियसभाका अध्यक्ष गणेशप्रसाद तिमिल्सिनाले विविधताभित्रको एकता नै नेपाल र नेपालीको पहिचान तथा विशेषता भएको बताउनुभएको छ । मुस्लिम समुदायको चाड बकर इदका अवसरमा एक शुभकामना सन्देश दिनुहुँदै उहाँले बहुभाषिक, बहुसांस्कृतिक देशका रूपमा परिचित नेपालले सबै समुदाय र धर्मको सम्मानमा विश्वास राखेको बताउनुभएको छ ।

अध्यक्ष तिमिल्सिनाले यस चाडले नेपाली समुदायमा आपसी भ्रातृत्व, मित्रता, सामाजिक सद्भाव र एकता कायम गरी देशको समृद्धिको यात्रामा साथ पुग्ने विश्वास व्यक्त गर्नुभएको छ । उहाँले यस पर्वका अवसरमा सम्पूर्ण मुस्लिम समुदायमा सुख, शान्ति, समृद्धि र सुस्वास्थ्य एवं उत्तरोउत्तर प्रगतिको शुभकामना व्यक्त गर्नुभएको छ ।

यस्तै, राष्ट्रियसभाका उपाध्यक्ष शशीकला दहालले पनि बकर इदका अवसरमा शुभकामना दिनुहुँदै मुस्लिम समुदायमा सुख, शान्ति, समृद्धि, सुस्वास्थ्य एवं दीर्घायुको कामना गर्नुभएको छ । उहाँले नेपाल बहुधार्मिक, बहुसांस्कृतिक, बहुभाषिक, बहुजातीय पहिचानले समृद्ध मुलुक भएको स्मरण गर्नुभएको छ ।

मुस्लिम समुदायले विशेष महत्वका साथ मनाउने यस पर्वले नेपालीका बीचमा आपसी एकता एवं सद्भाव, धार्मिक सहिष्णुता र एकअर्काप्रति सम्मानको भावना विकास गरेर लैजाने उहाँले विश्वास व्यक्त गर्नुभएको छ ।

सम्बन्धित खबर

Back to top button