रसुवा र नुवाकोटमा आएको विनाशकारी बाढीपछि उद्धार, राहत तथा अनुगमनका गतिविधि तीव्र पारिएको छ । प्रधानमन्त्री बालेन शाहले बाढी प्रभावित नुवाकोटको विदुर क्षेत्रको स्थलगत निरीक्षण गर्नुका साथै घाइतेहरूसँग भेटघाट गर्नुभएको छ ।
प्रधानमन्त्री शाह बिहिबार बिहान पूर्वाधार विकास मन्त्री सुनिल लम्सालसहित स्थलमार्ग हुँदै विदुर पुग्नुभएको हो । निरीक्षणका क्रममा उहाँले बाढीबाट प्रभावित क्षेत्रको अवस्था र उपचाररत घाइतेहरूको स्वास्थ्य अवस्थाबारे जानकारी लिनुभएको छ ।
भोटेकोशी नदीमा आएको बाढीपछि सम्पर्कविहीन पर्यटकको संख्या ६ सय ४४ पुगेको नेपाल पर्यटन बोर्डले जनाएको छ। बोर्डका अनुसार सम्पर्कविहीनमध्ये सबैभन्दा धेरै १७८ भारतीय पर्यटक रहेका छन्।
त्यसै गरी १२७ नेपाली, ६५ अमेरिकी र ५३ युक्रेनी पर्यटक सम्पर्कविहीन छन्। अन्य विभिन्न देशका पर्यटकसँग पनि सम्पर्क हुन बाँकी रहेको बोर्डले जनाएको छ।
बाढी आएलगत्तैदेखि उद्धार कार्यलाई तीव्रता दिँदै नेपाली सेनाले भदौ ११ गते बिहानदेखि टिमुरे, धुन्चे र मैलुङ क्षेत्रबाट विभिन्न ६ देशका ४५ विदेशी नागरिकसहित कुल ३३६ जनाको हेलिकप्टरमार्फत सुरक्षित उद्धार गरेको छ ।
नेपाली सेनाका अनुसार करिब चार हजार सुरक्षाकर्मी खोज तथा उद्धार, घाइतेको उपचारमा सहयोग, राहत सामग्री वितरण तथा प्रभावित क्षेत्रमा समन्वयात्मक रूपमा परिचालित छन्।
प्रभावित क्षेत्रमा उद्धार र राहतका कार्यलाई अझ प्रभावकारी बनाउँदै सम्पर्कविहीन व्यक्तिहरूको खोजी कार्य निरन्तर जारी रहेको सम्बन्धित निकायले जनाएको छ।
प्रतिक्रिया राख्नुहोस्