पूर्व प्रधानमन्त्री डा. बाबुराम भट्टराईले नेपालमा राजतन्त्र पक्षधरहरुको प्रदर्शनमा जनताको आकर्षण बढ्नुको कारण लोकतन्त्रको विकल्प खोजेर नभई ओली सरकारसंगको असन्तुष्टिका कारण रहेको बताउनुभएको छ ।
नेपाल समाजवादी पार्टी (नयाँ शक्ति)का डा. भट्टराईले सोमबार द हिन्दूसँगको अन्तर्वार्तामा नेपाली नागरिकको असन्तुष्टि ओली सरकारसंग रहे पनि लोकतन्त्रप्रति नभएको स्पष्ट पार्नुभएको हो ।
भारतमा एक औपचारिक कार्यक्रममा सहभागी हुन त्यहाँ रहनुभएका उहाँले नेपालमा लोकतान्त्रिक प्रक्रिया कमजोर हुने र राजतन्त्र फर्किने कुनै सम्भावना नरहेको स्पष्ट गर्दै सो कुरा बताउनुभएको हो ।
भट्टराईले जनता ओली र देउवा सरकारप्रति असन्तुष्ट छन्, लोकतान्त्रिक प्रणालीप्रति होइन भन्दै काठमाडौंमा हालै भएको राजतन्त्र पक्षधर प्रदर्शनले पर्याप्त राजनीतिक समर्थन नपाएको पनि बताउनुभयो ।
भट्टराईले अहिलेको सरकारप्रति बढ्दो असन्तुष्टि हुँदाहुँदै पनि तत्काल सरकार परिवर्तनको सम्भावना न्यून रहेको र परिवर्तन भए पनि गुणात्मक परिवर्तन हुने सम्भावना नरहेको बताउनुभयो ।
अन्तरवार्ताका क्रममा डा. भट्टराईले भन्नुभयो, “नेपाल अहिले शेरबहादुर देउवा, केपी शर्मा ओली र प्रचण्ड भन्ने तीन नेताको चक्रमा फसेको छ। आर्थिक विकास निकै सुस्त भएको कारण युवाहरु निराश छन्। जनताले परिवर्तन खोजिरहेका छन्, त्यसैले हामी नयाँ मोर्चा गठन गर्दैछौं ।”
प्रतिक्रिया राख्नुहोस्