जापानको औसत बेरोजगारी दर अघिल्लो वर्षको तुलनामा मार्चमा समाप्त भएको आर्थिक वर्ष २०२५ मा ०.१ प्रतिशत बिन्दुले बढेर २.६ प्रतिशत पुगेको सरकारी तथ्याङ्कले मंगलबार देखाएको छ। सो वर्षमा बेरोजगारहरूको सङ्ख्या ५०,००० ले बढेर १८ लाख पुगेको छ।
यद्यपि, आन्तरिक मामिला तथा सञ्चार मन्त्रालयका अनुसार सोही अवधिमा रोजगारीमा रहेकाहरूको सङ्ख्या ३,६०,००० ले बढेर ६ करोड ८२ लाख ९० हजार पुगेको छ। सन् १९५३ मा तुलनात्मक तथ्याङ्क राख्न सुरु गरेयताकै यो सबैभन्दा उच्च सङ्ख्या हो।
बेरोजगारहरूमध्ये ४,२०,००० जनालाई कामबाट निकालिएको थियो (जुन अघिल्लो वर्षको तुलनामा १०,००० ले बढी हो), जबकि ७,६०,००० जनाले राम्रो अवसरको खोजीमा आफैँले काम छाडेका थिए। मन्त्रालयका अनुसार नयाँ जागिर खोज्नेहरूको सङ्ख्या ३०,००० ले बढेर ५ लाख पुगेको छ।
मार्च महिनामा मात्रै बेरोजगारी दर अघिल्लो महिनाको २.६ प्रतिशतबाट थोरै बढेर २.७ प्रतिशत पुगेको छ। सोही अवधिमा रोजगारीमा रहेकाहरूको सङ्ख्या ‘सिजनली एडजस्टेड’ आधारमा ०.२ प्रतिशतले घटेर ६ करोड ८१ लाख ५० हजार कायम भएको छ।
स्वास्थ्य, श्रम तथा कल्याण मन्त्रालयको छुट्टै तथ्याङ्क अनुसार, मार्चमा सातवटा क्षेत्रमा नयाँ रोजगारीका अवसरहरूमा गिरावट आएको छ। सबैभन्दा बढी गिरावट सूचना तथा सञ्चार क्षेत्रमा देखिएको छ, जहाँ अघिल्लो वर्षको तुलनामा १५.८ प्रतिशतले रोजगारी कटौती भएको छ।
यसैगरी, थोक तथा खुद्रा व्यापार क्षेत्रमा ६.५ प्रतिशत र आवास तथा रेस्टुरेन्ट सेवा क्षेत्रमा ६.४ प्रतिशतले रोजगारीका प्रस्तावहरू घटेका छन्।
प्रतिक्रिया राख्नुहोस्