कतारले संयुक्त राष्ट्रसंघको ८१औँ महासभालाई सम्बोधन गर्ने क्रममा इजरायली प्रधानमन्त्री बेन्जामिन नेतन्याहुले कतारमाथि लगाएको आरोप अस्वीकार गरेको छ।
कतारले नेतन्याहुको अभिव्यक्ति इजरायलले कब्जा गरेका प्यालेस्टिनी क्षेत्रमा गरिरहेका गतिविधिबाट विश्वको ध्यान मोड्ने प्रयास भएको बताएको छ।
कतारको विदेश मन्त्रालयका प्रवक्ता माजेद अल–अन्सारीले शुक्रबार सामाजिक सञ्जाल ‘एक्स’मा वक्तव्य जारी गर्दै महासभामा नेतन्याहुले कतारले इजरायलविरुद्ध जनमत प्रभावित पार्ने अभियान सञ्चालन गरिरहेको भनी लगाउनुभएको आरोपलाई पूर्ण रूपमा अस्वीकार गर्नुभएको हो।
“संयुक्त राष्ट्रसंघको महासभामा इजरायली प्रधानमन्त्री बेन्जामिन नेतन्याहुले कतारले इजरायलविरुद्ध जनमत प्रभावित पार्ने अभियान सञ्चालन गरिरहेको भनी लगाउनुभएको आरोपलाई हामी स्पष्ट रूपमा अस्वीकार गर्छौँ,” अल–अन्सारीले भन्नुभयो।
उहाँले कतारविरुद्ध गरिएको यस्तो प्रचार इजरायली सरकारले कब्जा गरिएका प्यालेस्टिनी क्षेत्रमा गरेको भनिएको गम्भीर हिंसा र त्यसबाट उत्पन्न मानवीय संकटबाट विश्वको ध्यान अन्यत्र मोड्ने प्रयास मात्र भएको बताउनुभयो।
अल–अन्सारीले विशेष गरी युवामाझ विश्वव्यापी जनमतमा देखिएको परिवर्तनलाई कथित ‘प्रभाव अभियान’को परिणामका रूपमा प्रस्तुत गर्नु उनीहरूको चेतना र निर्णय क्षमताको अपमान भएको बताउनुभयो।
“विशेषगरी युवामाझ बढिरहेको विश्वव्यापी जनमतको परिवर्तनलाई ‘प्रभाव अभियान’को आरोपमा सीमित गर्नु त्यस्तो पुस्ताको चेतना र निर्णय क्षमताको अपमान हो, जसले विश्वसामु प्रत्यक्ष रूपमा भइरहेको घटनालाई आफ्नै आँखाले देखिरहेको छ र त्यसैका आधारमा आफ्नो धारणा बनाइरहेको छ,” उहाँले भन्नुभयो।
कतारका प्रवक्ताले इजरायली नेतृत्वले विश्वले इजरायललाई फरक दृष्टिले हेरेको चाहने हो भने आफ्ना नीतिमा परिवर्तन ल्याउनुपर्ने बताउनुभयो। उहाँले अन्तर्राष्ट्रिय कानुनको सम्मान गर्न र आफ्ना गतिविधिप्रति जिम्मेवारी लिन पनि इजरायललाई आग्रह गर्नुभयो।
“जनताले आफैँले देखिरहेका घटनाका आधारमा विश्वव्यापी जनमतमा आएको परिवर्तनका लागि कतार वा अन्य कसैलाई जिम्मेवार ठहराउने प्रयास अब विश्वसनीय छैन,” अल–अन्सारीले भन्नुभयो।
कतारको यस्तो प्रतिक्रिया संयुक्त राष्ट्रसंघको महासभामा नेतन्याहुले कतारसहित केही विदेशी मुलुकले इजरायलविरुद्ध आफूले ‘झूटा प्रचार’ भनेका सामग्री फैलाउन ठूलो रकम खर्च गरिरहेको आरोप लगाएपछि आएको हो।
महासभालाई सम्बोधन गर्दै नेतन्याहुले भन्नुभएको थियो, “धेरै विदेशी मुलुकले मेरो देशबारे झूट फैलाउन अकल्पनीय रकम खर्च गरेका छन्। त्यसो गर्ने पहिलो देश कतार हो। उनीहरूको उद्देश्य स्पष्ट थियो—युवाको मनमा इजरायल, अमेरिका र पश्चिमप्रति घृणा पैदा गर्नु।”
नेतन्याहुले कतारले हमासका नेताहरूलाई आफ्नो देशमा आश्रय दिएको भन्दै आलोचना गर्नुभयो। साथै, उहाँले टर्कीलाई ‘यहुदीविरोधी झूटको मुख्य प्रसारक’ बनेको आरोप लगाउँदै टर्कीका राष्ट्रपति रेचेप तैयप एर्दोगानमाथि समेत विभिन्न आरोप लगाउनुभयो।
कतार र इजरायलबीचको यो आरोप–प्रत्यारोप संयुक्त राष्ट्रसंघको महासभामा गाजासहित प्यालेस्टिनी क्षेत्रमा जारी द्वन्द्व, त्यसको मानवीय प्रभाव र अन्तर्राष्ट्रिय जनमतको बदलिँदो धारलाई लिएर देखिएको कूटनीतिक तनावकै निरन्तरता हो।
प्रतिक्रिया राख्नुहोस्