राजधानीमा जारी नेपाल प्रिमियर लिग (एनपिएल) अन्तर्गत लुम्बिनी लायन्सले जनकपुर बोल्ट्स सामू जितको लागि १५० रनको लक्ष्य प्रस्तुत गरेको छ ।
कीर्तिपुरस्थित त्रिभुवन विश्वविद्यायल क्रिकेट मैदानमा भएको टस हारेर पहिले ब्याटिङ गरेको लुम्बिनीले निर्धारित २० ओभरमा ८ विकेट गुमाउँदै १४९ रन बनायो । लुम्बिनीको लागि कप्तान रोहितकुमार पौडेलले ३० बलमा ३ चौका र १ छक्का प्रहार गर्दै ३४ रन बनाए भने निरोशन डिकवालाले २७ रन जोडे ।
त्यस्तै दिलिप नाथले २५ रन जोड्दा आसिफ शेखले २१, रुबेन ट्रमपलम्यानले १५, शमिम हुसेनले १३ र सन्दीप जोराले ९ रन बनाए । जनकपुरको लागि बिशाल सुस्लिङ्ग र राहुल यादवले समान दुई-दुई विकेट लिए भने ललितनारायण राजवंशी, अभिषेक तिवारी र हर्मीत सिंहको भागमा समान एक-एक विकेट रह्यो ।
रोहितकुमार पौडेलको कप्तानीमा रहेको प्रतियोगितामा अपराजित लुम्बिनी तीन खेलमा पाँच अङ्क जोड्दै शीर्ष स्थानमा रहेको छ । आज जनकपुरलाई हराउँदै लुम्बिनी शीर्ष स्थान कायम राख्ने योजनामा छ । साविक विजेतासमेत रहेको लुम्बिनीले पहिलो खेलमा सुदूरपश्चिम रोयल्सलाई ७ विकेटले पराजित गरेको थियो ।
त्यस्तै, दोस्रो खेल वर्षाका कारण रद्द भएपछि चितवन राइनोजसँग अङ्क बाँडेको थियो भने तेस्रो खेलमा पोखरा एभेन्जर्सलाई ८ विकेटले हराएको थियो ।
यता पहिलो संस्करणको विजेता जनकपुरले पनि लुम्बिनीलाई हराउँदै प्रतियोगिताको शीर्ष स्थानमा उक्लने दाउमा छ । चार खेलबाट दुई खेलमा जित तथा दुई खेलमा हार सहित जनपुरले ४ अङ्क जोेडेको जनकपुर अङ्क तालिकाको चौथो स्थानमा रहेको छ ।
जनकपुरले काठमाडौँ गोर्खाजलाई ८ विकेटले र पोखरा एभेन्जर्सलाई ९ रनले पराजित गर्दा कर्णाली याक्ससँग १९ रन तथा विराटनगर किङ्ग्ससँग दुई रनले पराजित भएको थियो ।
प्रतिक्रिया राख्नुहोस्