राजनीति

प्रदेशसभा वा सरकार भङ्ग गर्ने कुनै सम्भावना छैन

प्रतिनिधिसभा विघटन भएपछि सत्तारुढ नेपाल कम्युनिष्ट पार्टीमा भएको विभाजनपछि प्रचण्ड-नेपाल समूहले मुख्यमन्त्रीहरु बिरुद्ध अविश्वास प्रस्ताव दर्ता र पार्टी इञ्चार्जहरुलाई हटाएर आफ्ना मान्छे मनोनित गरेपछि प्रदेशसभा पनि विघटन हुने आँकलन भैरहका बेला एक मन्त्रीले प्रदेशसभा वा सरकार भङ्ग गर्ने कुनै सम्भावना नरहेको बताएका छन् ।

सोमबार मन्त्री शिवमाया तुम्बाहाम्फेले प्रदेशसभा पनि विघटन हुनसक्ने जानकारी दिए लगत्तै खानेपानी मन्त्री मणिचन्द्र थापाले राजाजरकोट पुगेर प्रदेशसभा वा सरकार भङ्ग गर्ने कुनै सम्भावना नरहेको बताउनुभएको हो ।

नेपाल कम्युनिष्ट पार्टी (नेकपा) जाजरकोट जिल्ला भेलालाई सम्बोधन गर्न जाने क्रममा सुर्खेतमा पत्रकारसँग कुरा गर्दै मन्त्री थापाले प्रतिनिधिसभा विघटन र निर्वाचन घोषणाले मुलुकलाई पुनः स्थायित्व दिने बताउँदै राजनीतिक स्थायित्वका लागि निर्वाचनमा जानाको विकल्प नभएको पनि बताउनुभयो ।

उहाँले प्रतिनिधिसभा विघटन गर्ने प्रधानमन्त्रीको कदम अग्रगामी भएको जिकिर गर्दै भन्नुभयो, “कतिपय शक्तिले यसलाई प्रतिगामी भनेका छन्, राजनीतिशास्त्रको सिद्धान्तले पनि सरकार वा प्रणाली सङ्कटमा पर्यो भने चुनावमै जाने हो । त्यसैले प्रतिनिधिसभा विघटनलाई प्रतिगामी कदम मान्न सकिन्न, ताजा जनादेशका लागि निर्वाचनमा जानु अग्रगामी कदम हो ।”

नेकपा स्थायी कमिटी सदस्य थापाले नेकपा गम्भीर सङ्कटमा फसे पनि विभाजन भइनसकेको बताउँदै आगामी निर्वाचनसम्म पार्टीमा देखिएको सङ्कट समाधान हुने सम्भावना कायमै रहेको धारणा राख्नुभयो ।

नेकपा कर्णाली प्रदेश संयोजन गर्ने जिम्मेवारी पाउनुभएका खानेपानीमन्त्री थापाले औपचारिक रुपले पार्टी विभाजन नभइसकेकाले नेता÷कार्यकर्ताको व्यवस्थापन हुन बाँकी रहेको बताउनुभयो ।

प्रदेश सरकार फेरबदलबारेमा कुनै प्रकारको छलफल नभएको बताउँदै उहाँले भन्नुभयो, “अहिले प्रदेशसभा वा प्रदेश सरकार भङ्ग गर्ने कुनै सम्भावना छैन ।”

सम्बन्धित खबर

Back to top button