काठमाडौंका अस्पतालहरुमा रक्तचाप परीक्षणको फरक फरक रिपोर्ट आएको भन्दै नेपाली काँग्रेसका वरिष्ठ नेता रामचन्द्र पौडेल उपचारका लागि भारतको नयाँदिल्ली प्रस्थान गर्नुभएको छ ।
उहाँका स्वकीय सचिव चिरञ्जीवी अधिकारीले रक्तचापको जाँचका क्रममा एकै दिनमा फरकफरक रिपोर्ट देखिएपछि थप उपचारका लागि नयाँ दिल्ली जानुभएको जानकारी दिनुभएको छ ।
नयाँदिल्ली बसाईंका क्रममा राजनीतिक भेटघाट पनि हुनसक्ने स्वकीय सचिव अधिकारीले बताउनुभयो । काँग्रेसको १४औँ महाविधेशनका सम्बन्धमा पार्टीको केन्द्रीय कार्यसमितिले बहुमतका आधारमा निर्णय गरेपछि नेतृत्वसँग असन्तुष्ट बन्नुभएका नेता पौडेल र सभापति शेरबहादुर देउवाबीच आइतबार मात्रै भेटवार्ता भएको थियो । सो भेटपछि आज नेता पौडेल नयाँदिल्ली जानुभएको हो ।
