जन सरोकार

कोरोना महामारीमा लुटको अवसर खोज्नेहरु

कोभिड–१९ महामारीको सुरक्षा तथा स्वास्थ्य संवेदनशील जस्तो विषयलाई ‘लुट’ को अवसर बनाउने गरेका छन् । नक्कली मास्क विक्रीदेखि पिसीआर परीक्षणको नक्कली रिपोर्ट बनाउने गिरोह नै सक्रिय छन् ।

नेपालमा स्वाब संकलनबिना परीक्षण नै नगरी संक्रमण नभएको प्रमाणपत्र दिने धन्दामा ठूलो गिरोह र चिकित्सकहरु नै संलग्न भएको पाइएको छ ।

विदेश जाने प्रक्रियामा रहेकाहरुलाई नक्कली पिसीआर रिपोर्ट बनाउन गिरोह नै संलग्न रहेका तथ्य पटकपटक सार्वजनिक भैरहेको र विमानस्थलबाटै ठूलो संख्यामा यात्रुहरुलाई फिर्ता पठाइएको थियो ।

गत वैशाखको पहिलो साता नेपालबाट कुवेत हिँडेका एक भारतीय नागरिक शङ्कास्पद पीसीआर रिपोर्टसहित त्रिभुवन अन्तर्राष्ट्रिय विमानस्थलबाट पक्राउ परे । उनको रिपोर्टमाथि शङ्का लागेपछि विमानस्थल हेल्थ डेस्कले नै नियन्त्रणमा लिई प्रहरीको जिम्मा लगायो । रिपोर्ट नेगेटिभ भए पनि त्यसमा प्रयोग भएको ‘छाप र हस्ताक्षर’ शङ्कास्पद देखिएको थियो ।

वैशाखमै पीसीआर रिपोर्टमाथि शङ्का लागेका १२२ जनालाई विदेश जानबाट रोकी विमानस्थलबाटै फर्काइएको थियो । त्यस्तै, काठमाडौँबाट नेगेटिभ पीसीआर रिपोर्ट लिएर हङकङ पुगेका तीन नेपालीको पुनः परीक्षण गराउँदा कोरोना पोजेटिभ देखियो । गत पुस १४ गते भएको उक्त घटनापछि हङकङले नेपालको पीसीआर परीक्षण रिपोर्टमाथि नै प्रश्न उठायो ।

यी दुई नमुना घटनाको प्रकृति ठ्याक्कै मिल्दोजुल्दो देखिन्छ । विदेश जानका लागि नक्कली पीसीआर रिपोर्ट तयार पार्ने र पोजेटिभ देखिए पनि नेगेटिभ बनाउने । यस कार्यमा ठूलो गरोहकै संलग्नता रहेको तथ्य सावर्जनिक भएको छ ।

महानगरीय प्रहरी अपराध महाशाखाले नक्कली पीसीआर रिपोर्ट बनाउने गिरोहलाई कारबाही गर्न आफ्ना कर्मचारीलाई ‘विदेश जानका लागि’ भन्दै पीसीआर परीक्षण गर्न विभिन्न अस्पतालको ल्याबमा पठाई अनुसन्धान सुरु गरेको थियो ।

गत बुधबार प्रहरीको एक हप्ताको अनुसन्धानका क्रममा शङ्का लागेका अस्पतालमा पीसीआर परीक्षण गर्न पुगेका कर्मचारीलाई ल्याब सञ्चालक तथा कर्मचारीले ९/१० हजार तिरेमा ‘स्वाब नलिई दुई घण्टामै रिपोर्ट दिने’ बताएपछि सो तथ्य बाहिर आएको हो ।

प्रहरीका अनुसार यस कार्यमा चिकित्सकै संलग्नता देखिएको छ । तीनकुनेस्थित कान्तिपुर अस्पतालका पीसीआर ल्याब सञ्चालक डा। निर्मल गिरी र भक्तपुरको गट्ठाघरस्थित नागरिक कम्युनिटी टिचिङ हस्पिटलका ल्याब सञ्चालक डा। भावेष भट्टको संलग्नता देखिएको अपराध महाशाखाका प्रवक्ता कृष्णप्रसाद कोइरालाले बताउनुभयो । प्रहरीका अनुसार हाल दुवैजना फरार छन् ।

यस घटनामा नागरिक टिचिङ हस्पिटलका ल्याब प्रबन्धक प्रसन्नकुमार झा, ग्राहक खोज्ने कार्यमा संलग्न अभियुक्त धनुषाका रोशनकुमार छिट्टान, नागेन्द्रकुमार यादव र कान्तिपुर अस्पतालका ल्याब कर्मचारी माधव मैनालीसहित चार जना पक्राउ परेका छन् ।

पक्राउ अभियुक्तमध्ये रोशनकुमारको साथबाट आठ थान, प्रसन्न र नगेन्द्रको साथबाट १७ थान नक्कली पीसीआर रिपोर्ट बरामद भएका छन् । यसअघि सिनामङ्गलस्थित सुरिया हेल्थकेयर र मेरिट मल्टी केयर मेडिकल सेन्टर प्रालिमा छापा मारी आठ जनालाई पक्राउ गरेको थियो ।

महाशाखा प्रमुख वरिष्ठ प्रहरी उपरीक्षक वसन्त कुँवरका अनुसार नक्कली पीसीआर रिपोर्ट तयार पारी मानव स्वास्थ्यमाथि खेलवाड गरेको अभियोगमा १२ जनाभन्दा बढीलाई कारबाही र चारवटा अस्पतालका ल्याब सिल गरिएको छ ।

प्रतिक्रिया राख्नुहोस्

सम्बन्धित खबर

Back to top button